Rawlthar tha ber Bellingham

November 17, zirtawpni khan Europe khawmuala football khel zinga rawlthar chawimawina ngaih-hlut hlawh ‘Golden Boy Award 2023’ sem a ni a. England leh Real Madrid tana khel tha tluang tak Jude Bellingham chuan Golden Boy Award 2023 a dawng.
Kum 20 mi Jude Bellingham hian nipui bazar 2023 khan Borussia Dortmund atangin Real Madrid a zawm a, Spanish club lianah a che tha zui hle. Real Madrid tan hian inelna hrang hrangah vawi 14 khelin, goal 13 zet a thun tling der tawh. Real Madrid tan a chet that ang bawkin England tan a chetha em em bawk a, Three Lions player pawimawh a ni. Club leh ram tan a chet that tluang em vangin European top fligt a khel, kum 21 hnuai lama player tha berah thlan niin, Golden Boy award 2023 hlan a ni.
He chawimawina dawng tur hian Barcelona tana goal thuntu naupang ber record thar siam a, Spain player pawimawh ni der tawh Jamal Musiala nen an inel fal a. La Liga-a an elpui lian Barcelona rawlthar duhawm hi a khum ta thung. Golden Boy a thlan thar Bellingham hi English player zingah kum 2014 hnu lamah he chawimawina dawng leh thei hmasa ber a ni. Golden Boy Award hi player ropui tak tak Wayne Rooney, Lionel Messi, Kylian Mbappe leh Erling Haaland te pawhin an lo dawng tawh bawk. Kum 21 chin hnuai lam dawn thin a nih vangin he chawimawina dawng zawn hi an la awm lo thung.
Mipa lamah Jude Bellingham-a’n chawimawina sang a dawn laiin hmeichhe lamah Colombia leh Real Madrid forward Linda Caicedo chuan Golden Girl award a dawng ve thung. Chawimawina semchhuahna hunah hian Manchester City striker Haaland chu Golden Player Man award hlan a ni. Hmeichhe lamah Barcelona leh Spain midfielder Aitana Bonmati chu Golden Player Woman award hlan a ni bawk.
Tarlan tawh angin Jude Bellingham hian Real Madrid leh England tan a khel tha thei em em a, he chaiwmawina dawn pawh hi a phu viau a ngaih a ni.
Kum 2003 atang khan Golden Boy Award hi Italian sports newspaper Tuttosport buatsaihin sem thin a ni a. Germany (Bild), Switzerland (Blick), Portugal (A Bola), France (l’Équipe & France Football), Spain (Marca & Mundo Deportivo), Greece (Ta Nea (Greece), Russia (Sport Express), Netherlands (De Telegraaf) leh United Kingdom (The Times) a thawkten an thlang thin.