RBI Aizawl hotuten larsap kawm

Reserve Bank of India (RBI) Aizawl office general manager T Lhungdim leh hotu dangte chuan Zirtawpni khan larsap Dr Hari Babu Kambhampati chu RBI-in kum 90 a tlin puala hmuin an hmalakna leh RBI kaihhnawih pawimawh dang an sawipui.
Mipuiin bank hman tangkai dan leh hemi kaltlanga hamthatna awm an dawn theihnan inzirtirna kalpui nasat a tul tih larsap hian a sawi a. RBI hotute chu bultanna tur nei remchangloten loan hmanga bul an tan theihnan an hnuaia scheme pawimawhte nasa zawka kawhhmuh thin tura chahin, an service mamawhtute panchilh a, an harsatna leh tanpui theih dan ngaihtuahpui turin a chah. Sawrkar scheme pawimawh chu miretheite chawikan nana duan a nih avangin ngaihpawimawha neih tura hrilhin, financial literacy campaign-in rah tha a chhuah em, tih chena enzui turin a chah bawk.
RBI hotute hian Mizorama an hmalakna tlangpui sawiin, financial inclusion leh financial literacy campaign an kalpui bakah lead bank scheme priority sector lending hnuaiah target zaa 40 an tihhlawhtlin thute, RBI-in unified lending interface a ruahman thute an sawi.
RBI hotute sawi danin, India ram state 10 leh union territory 6 chu digitise an ni tawh a. Mizoramah chuan Aizawl leh Serchhip district digitise fel tawh niin, district dang zawng pawh digitise tuma hma lak mek a ni. Heng bakah hian sawrkar scheme pawimawh, mipuiin hlawk leh awmze nei zawka an chhawr tangkai theih nana hmalak tulte sawi ho a ni.