RBI-in mipui hriat tur hrilh

RBI-in mipui hriat tur hrilh
Sum leh pai kaihhnnawiha mipui hriat tur tul leh sawrkar laipuiin mipui tana ruahmanna a siamte chhawr tangkai tura inhrilhhriatna chu Thawhlehni khan Reserve Bank of India Aizawl chuan Saitual district tan Saitualah a buatsaih.
‘Saturation Camp for Financial Inclusion Schemes’ leh ‘Re-KYC cum Field Level Financial Literacy Programme’ neih hi RBI Aizawl general manager (O-i-C) T Lhungdim chuan a hawng a. Saitual district bawrhsap Lalngura Tlau bakah Mizorama bank hrang hrang hotute an tel a, Saitual khawtual atangin mi 100 chuangin an chhim a ni.
Sawrkar laipui scheme – PMJDY, PMJJBY, PMSBY, leh APY a inziaklut thar tur leh KYC tih that ngai tihfel tur mi engemawzat an tel a. Camp-ah hian digital banking, grievance redressal (lungawilohna chinfel) leh financial literacy (sum leh pai chungchang inzirtir) chu ngaihpawimawh zual a ni.
Saitual district-a State Bank of India, Mizoram Rural Bank leh Mizoram Cooperative Apex Bank-a thawktute leh lead district manager Saitual district kaihhruaiin camp-ah hian an tel a, document 100 chuang endikin tihfel a ni a, social security scheme leh insurance hrang hranga inziaklut engemawzat an awm bawk.