Real boss hlawhtling ber Ancelotti

Qatar-a Fifa Intercontinental Cup final-ah Nilaini zan khan sithum faia Mexican club Pachuca sawpin Real Madrid an champion a, an manager Carlo Ancelotti chuan mel lung thar phunin, Bernabeu club tan title 15 a lakpui tling a, coach zingah he club history-a trophy hawn sak hnem ber a ni.
Italian coach hian kumin August thla khan European Super Cup-a Atalanta hnehin Real Madrid head coach zinga title la hnem ber ni reng thin Miguel Munoz-a record a nihrualpui a, tunah amahin record thar a pumbilh ta nge nge a ni.
Spanish television channel Telecinco hnenah Ancelotti chuan, “Title chu a lo tling thahnem ve ta hle mai a, ka hlim takzet a ni. Hlawhtlinna thawnthu ngei a ni e.
Doha khawpuia Lusail Stadium inkhela a naute khawsak dan tarlang telin, “Vawiin hian ka player-te rilru put hmangin min tilawm hle bawk. Tlarhma lamah danglamna hmuh tur a awm ta a, Vinicius Jr-a game ropui kan thlirliam a; goal bawh lamah kan titha.
“He team hian theihna a ngah tawk a, Kylian (Mbappe) pawh a khel tha a, Rodrygo pawhin kan goal hnihna khungin, season laihawl buai tak karah kan khelmual atanga hmun hla takah lehnghal title kan hlawhchhuak thei hi kan hlim takzet a ni,” a ti.
Kum 65-a upa Ancelotti hi khawvel football-a hnuhma nei hraw berte zinga pakhat niin, kum thum liamta khan he club great Zinedine Zidane-a hmunruak luah turin Bernabeu-ah a vawihnihna’n a kirleh a; a mission-ah a chiang a, Real trophy tihpun a tumna kawngah a hlawhchham lo!
A chimchin sanzia chu manager-te zinga Europe league lian zual panga – England, Spain, Germany, Italy leh France-a title la kim vek thei hmasaber a nihna hian a nemnghet tawk a; season thum chhungin Real Madrid chu Champions League title pahnih leh La Liga trophy a double pui thei a, he club-a a sulhnu hnutchhiah hi midang tana khum a har khirh khawp tawh ang!
Ancelotti hoa Real Madrid silverware khawl tawhte chu Champions League title pathum, Club World Cup pahnih, European Super Cup pathum, Spanish League title pahnih, Spanish Cup pahnih, Spanish Super Cup pahnih leh tunah Intercontinental Cup title pakhatte hi a ni.
Inkhel thlir ila…
Nilaini zan inkhelah hliam avangin Real Madrid game hnuhnungber khel thei lo mah se Kylian Mbappe chuan bul a tan thei a, minute 37-ah Vinicius Junior siamsak atanga goal hmahruai khungin, second half tir lam minute 53-a Rodrygo goal tur a chhawpsak bawk.
Real goal thumna hi hun pangngai tawp hma minute ruk la awma Vinicius-a penalty chhuihluh niin, he penalty hi Lucas Vazquez hlawhchhuah niin, box chhungah Oussama Idrissi chuan a titlu a, penalty a hringchhuak ta a ni.
Lusail Stadium kha kum hnih liamta World Cup final-a Mbappe ‘hat-trick’ siamna khelmual niin, Nilaini zanah Pachuca goal-a ding Carlos Moreno dan zawh loh goal a khung leh a, Argentina hneh loa an tlawmna mualah France captain-in goal lawm tur dang a nei leh.
Real Madrid goal hnihna Brazilian Rodrygo thunah khan pitchside monitor rawih a ngai a, mahse, Brazilian goal thun laia offside position luahtu Jude Bellingham kha goal luhna kawngah a inrawlh lo tih referee Jesus Valenzuela chuan a pawm a, Spanish giants goal hnihna a ding tlang.
Pachuca captain Salomon Rondon chuan hla derh dawrh atanga free-kick chhuihin Real Madrid goal-veng Thibaut Courtois chu a theihtawpin a fantir a; a hnuah West Brom leh Everton striker hlui kum 35 mi hian goal kham chung chiahah a tauhchhuak bawk.
Fifa Best awards sem atanga nikhat ral hnuah men’s player of the year chawimawina a dawn lawmin Vinicius chuan khelmualah goal a khung tih tarlang nawn leh ila.
Intercontinental Cup hi a vawikhatna niin, nakkum nipui laia team tam zawk ngial nena tournament thar anga khelh chhoh tawh tur Fifa Club World Cup thlakna niin, khamwualpui pangaa club competition champion theuhte’n straight knockout tournament kalphunga an khelh a ni.
Concacaf Champions Cup title changtu Pachuca khan final an luhna kawngah Caf Champions League holders Al-Ahly of Egyptan hneh a; Uefa Champions League winners Madrid erawh kha chu round hmasa lama inlan buai loa final direct tlang pawp an ni thung!