Real chelh loh Arsenal

April 16, Nilai zan khan UEFA Champions League (UCL) quarter-final thawh hnihna khelh zawh a ni a. English club lian Arsenal chuan Real Madrid an hneh nawn leh a, semi-final an lut. Arsenal rual hian Italian champion Inter Milan in Bayern Munich pal tlangin semi-final an lut ve bawk.
Real Madrid 1-2 Arsenal
London club lian Arsenal hian Europe a team lian te hlauh rawn Real Madrid chu quarter-final thawh khatnaah 3-0 ngawtin an lo sawp tawh. An mualah 3-0 ngawtin chak bawk mah se an khingpuite hi Real Madrid an ni miau mai si a, Santiago Bernabeu-a inkhel hmachhawn leh tur an ni bawk nen Arsenal tantute ngaihthain an awm thei lo. Si thum phur saa Arsenal hmachhawn tur ni bawk mah se inlehthalna lian lo thlentir fo tawh Real Madrid an zam lova, inlehthalna lian thlentir nawn leh ngei turin an inringtawk hle. Football ngainatute hmuh an tum chu Arsenal laka Real Madrid come-back a ni.
UCL-ah vawi 15 ngawt champion tawh Real Madrid hian an mikhual Arsenal lehthal ngei tumin tan an khawh a, an mualah hma taka goal thunin an mikhualte chhaihbuai an tum hle. An mikhualte nawr buai tum viau mah se Arsenal tlarhnung inremphui tak an su tlang thei lova, chawlhlawk hmain shot on target an nei miah lo nghe nghe. Goal thun mamawh Real hian goal an chhuah belh teuh thei viau zawk. Inkhel tantirh lamah Arsenal hian penalty an hmu. He penalty hi Bukayo Saka chuan inringtawk takin pet mah se Thibaut Courtois a paltlang zo lova, penalty a thelh.
Arsenal in penalty an pet goal loh vangin Real Madrid an phur a, penalty an hlawhchhuak zui ve nghal mai bawk. He penalty hi minute nga chhung ngawt VAR rawn a nih hnuin hnawl a ni a, Arsenal an him. Real Madrid hian penalty atangin goal thun se inkhel result a danglam phah thei hial mai thei. Inkhel hmuhnawm takah hian chawlhlawk hmain goal a lut thei lo.
Chawlhlawk hnu lamah inkhel a hmuhnawm leh zual a, goal thum ngawt hmuh tur a awm ta nghe nghe. Mikel Merino ball pek fing tak atangin Bukayo Saka chuan minute 65-naah fing takin a pet goal a, Arsenal hmahruaina goal a thun. Penalty a thelh vangin a laka pressure tam tak awm chu Saka hian a goal thun vangin a vai kiang. Saka goal thun hmang hian Arsenal in Real Madrid lakah 4-0 ngawtin hma an hruai a, semi-final an hnaih hle.
Saka goal thun hnu lawkah Arsenal defender pawimawh William Saliba a chesual a, an khingpuite goal a khilai. Saliba chetsual vang hian Vinicius Jr chuan goal ruakah a pet goal a, minute 67-naah an si phurh a sut then. UCL-a team hlauhawm bik Real Madrid hian goal thun belh tum viau mah se an hlawhtling zo lova, goal an chhuah belh ta zawk. Hun pangngai tawp hnuah Arsenal hian fuh zetin an khingpuite an nawr let a, player tlanchak Gabriel Martinelli chuan minute 90+3-ah awlsam taka pet goal in Arsenal chakna goal a thun. Arsenal hian UCL-a vawi 15 ngawt champion tawh Real Mdarid lakah 5-1 ngawtin hnehna an chang a, semi-final an lut. Semi-final-ah Liverpool leh Aston Villa hnawtchhuaktu PSG an hmachhawn zui leh ang.
Inter pawh an tlang
Nilai zana inkhel dangah Inter Milan leh an mikhual Bayern Munich te chu 2-2 in an inhnehtawk a. Italian champion Inter Milan hian si belhkhawmah 4-3 in hnehna an chang a, La Liga club lian FC Barcelona hmachhawn zui leh turin semi-final an lut.