Real hmahruaina chhah belh

Osasuna khelmuala 4-2 hnehna changin Real Madrid chuan Spanish La Liga table-a an hmahruaina an sawhnghet leh sauh a; Inrinni inkhel dangah anmahni hnaihbertu Girona chu Getafe khelmualah sikhat faiin an tlawm a, Carlo Ancelotti team hian khelh 29-ah point 10 zetin hma an hruaifal ta a ni.
Real zinchhuak tan hian minute lina lekah Vinicius Junior chuan goal hmahruai khungin, minute li a liam leh rualin Ante Budimir chuan Osasuna siphurh a sut a; minute 18-a Dani Carvajal-a goal khat tihluh ve leh hmangin mikhual team-in half time-ah 2-1-in hma an hruai phawt.
Second half tir lamah inhnaih takin Vinicius leh Brahim Diaz-te’n an khung belh a; hun pek belhah Iker Munoz chuan mualneitu team siphurh pakhat sut then ve bawk mah se Spanish giants hian nuamsain hnehna an chang a, table-a an hmahruaina chu title beiseina sang tak nei ve hman Girona tana chuhbuai huphurhawm hle tawh tur khawpin an kham sang ta a ni!
Brazilian Vinicius Junior khan La Liga bika Osasuna vawikua a hmachhawn tawhah goal nga a tilut tling ta a ni.
Champions League lama beiseina la nei mek Real Madrid hian Ancelotti hnuaia an La Liga title pahnihna tur an hnaih leh kuar tawh a; Italian coach Ancelotti hian inelna hrang hrangah Bernabeu club chu match 200 a chakpui tling ta chiah a ni.
Tarlan tak angin, Real hian Champions League trophy an la chuh kal mek a, quarter-final stage-ah champion lai Manchester City nen inchinfel an hmabak.