Real-in Super Cup final lut

Nikum Spanish Su-per Cup final-a chak zo lo Real Madrid chuan an chetsual tawhna siamtha thei turin final an lut leh ta a, Nilaini zan Saudi Arabia rama semi-final match pui takah 5-3-in Atletico Madrid an hneh.
Spanish Super Cup semi-final inkhelah hian hun pangngaiah 3-3-in an tawp a, extra time-ah Spanish giants hian goal hnih thun belhin, Pathianni zan final-ah Barcelona leh Osasuna inkhela chak zawk zawk an su zui leh ang. Nizan semi-final match dangah Barca leh Osasuna hi an intum a, result tarlan hman a ni lo.
Real leh Atletico in-khel lamah kirleh ila, minute 90 chhungin Ber-nabeu club tan Antonio Rudiger, Ferland Mendy leh Dani Carvajal-te’n goal khat diat diat an thawhkhawm a; Atleti tan Mario Hermoso, Antoine Griezmann leh Rudiger (own goal)-te’n an thun ve thung.
Griezmann hian Atletico Madrid tan goal 174 thun tling chiahin, an club tana goal khung hnem ber record ding lai a khum.
Hun pekbelh minute 116-ah Joselu chuan Real hmahruaina goal khung-in, hun tawp dawnah Brahim Diaz chuan Real tan a khung belh leh a; semi-final leh-lamah Barcelona an chak chuan Real hian nikum final-a 3-1-a an hneh loh Catalan club laka phuba lakna hun remchang an nei thei ang a, kum zawnin Spanish Super Cup El Clasico final thlir tur a awm ang.
Diego Simeone-a team Atletico Madrid hian karleh Ningani Copa del Rey last 16-ah Real Madrid bawk hi an hmachhawn leh dawn a ni.