Real Madrid an chak zo lo

Ningani zan khan Spanish La Liga-ah inkhel pahnih a awm a, Las Palmas muala lenglut champion lai Real Madrid in hnehna an chang zo lo. Champion lai Real Madrid hian season tharah vawi thum khel tawhin point nga chiah an la hmu. Ningani zana inkhel dangah Girona chuan awlsam takin hnehna an chang ve thung.
Estadio Gran Canaria a inkhelah mualneitu Las Palmas in bul an tan tha viau a, inkhel tan atanga minute 5-na lekah Alberto Moleiro chuan hmahruaina goal a thun. Hma taka goal an thun vangin an phur a, an inringtawk zui viau. Champion lai lakah point thum hmuh ngei tumin tan an khawh zui nasa hle a, hun rei tak chhung an hmahruaina humhim thei mah se an vannei reng seng lova, goal an chhuah ve ta nge nge. Real Madrid tan hian Vinicius Junior chuan penalty an hlawhchhuah chu minute 69-naah a pet goal a. He goal hmang hian Las Palmas lakah tlawm an pumpelh hram.
Champion lai Real Madrid in season tharah bul an tan tha lova chak an harsat. Los Blancos hian vawi thum khel tawhin vawi khat chiah an chak. An hmelma lian ber FC Barcelona in point 9 ngawt an hmuh tawh laiin anni chuan point 5 chiah an la hmu thung. Season tharah chak an harsat ang bawkin an forward thar Kylian Mbappe-a’n chetthat a harsat a. PSG tana goal thun reng thi Mbappe hian a club thar Real Madrid tan La Liga-ah goal a la thun thei lo.
Ningani zana inkhel dangah Girona chuan an mikhual Osasuna chu 4-0 ngawtin an sawp.