Real Madrid an tlawm!

Real Madrid an tlawm!
Hmahruaitu FC Barcelona nen an inkar tizim tura chak mamawh Real Madrid chu Nilaini zan khan Athletic Club chuan 2-1 in an lo hneh!
Thawhlehni zanah Barca-in 5-1 ngawta Mallorca an hneh vangin Real Madrid nen an inkar chu point liin an tizau. An elpui lian ber Barcelona nen an inkar tizim lehzual turin Real hian mi mualah chak an mamawh. Athletic Club lakah chak ngei tumin inlan mah se an tlawm tlat thung a, Barca nen an inkarah point li a tlazep nawn leh.
Atheltic leh Real hian inhnehtawk takin bul an tan a; chawhlawk hmain goal thun thei awm lo mah se chawlhlawk hnu lamah goal thum zet a lut thung.
Athletic tan hian Álex Berenguer chuan minute 53-naah hmahruaina goal a thun a; team lian laka goal an khung hmasak vangin an phur a, inrintawkna sang zawk nen an inlan chhunzawm.
Goal an thun vangin phur viau mah se an siphurh sut tuma Real Madrid tan khawh em erawh an dang zo lo thung.
Chak mamawh Real hian na takin an khingpuite an nawrlet a, goal pawh an thun ta thuai. Season thara beisei phak lo Jude Bellingham chuan minute 70-naah goal khungin an siphurh a sut.
Bellingham hian an match hnuhnung pahnihah goal a thun zawn leh ta a, ngai awhin, season liamtaa a ropuina a neilet leh tan dawn niin a lang.
Goal an thun vangin champion lai Real Madrid an phur thar a, chak theih beiseisa sang zawk an nei thar. An beiseina erawh tihhlawnsak an ni thuai thung. Minute 80-ah mualneitu tan Gorka Guruzeta chuan home team hmahruai nawn lehna goal a thun a; he goal hi Real Madrid in hun tawp thlengin an sut thei tawh lo a, uiawm takin an tlawm zui ta a ni.
Bernabeu club hian khelh khata khel tlem zawk chungin Barcelona an hnaih hman viau tawh a, Athletic Club lakah mak tak maia an tlawm leh tak si vangin Catalan team nen an inthlauhna chu point li a ni leh ta a ni.