Real Madrid hnehtu Lille

Nilaini zana UEFA Champions League khelhah champion lai Real Madrid chu mak tak maiin an tlawm. Real Madrid an tlawm rual hian Spanish club lian Atletico Madrid pawh Benfica lakah an mualpho ve bawk. Nilai zana UCL result langsar zual kan hrut kual ang.
Real an tlawm
Champions League a roreltu, UCL a nih tawh chuan englai pawha team huphurhawm ni reng thin Real Madrid chu nilai zanah tihmualphoin an awm a, French Club Lille lakah an tlawm ringawt. French Ligue 1-ah panganaa awm mek Lille hian Pierre-Mauroy Stadium-a an mikhual Real Madrid lakah bul an tan tha viau a, hma takah goal an thun nghal teuh hle. Goal thun theihna hun tha nei bawk mah se si nghak Lunin an paltlang zo lova, an hun tha an hloh.
Uiawm takin an hun tha hloh mah se Lille an hawihil rei lo va, penalty an hlawhchhuak. Free-kick atanga ball kal chuan Camavinga kutah chiang zetin a fuh a, Real Madrid in penalty an chawi. He penalty hi Jonathan David chuan minute 45’+2-naah cool raihin a pet goal a, hmahruaina goal a thun. Real Madrid hian an si phurh sut tum viau mah se hun tawp thlengin goal an thun thei lova, Lille lakah mak tak maiin an tlawm zui ta a ni.
Lille lakah an tlawm hi Champions League-ah bik chuan May 2023 hnu lama an tlawm vawi khatna a ni. Manager Carlos Ancelotti hnuaiah Los Blancos hi an khel tha viau a, inelna hrang hrangah tlawm nei lovin khelh 36 chhung zet an kal tluang tawh. A club chanchinah tlawm nei lova an kal tluan rei ber record siam tum viau mah se Lille lakah an tlawm vangin an beiseinate chu sarah a zam ral zui ta a ni. Lille in Real Madrid an hneh nawlh hi Champions League-a inlehthalna lian zual zingah a tel hial a rinawm.
UCL ah vawi 14 ngawt champion tawh Real Madrid hian tunlaia player tha tak tak an kawl khawm mek a. Tlarhmaah Kylian Mbappe, Vinicius Junior leh Rodrygo te an inkawp tir thei. Hei bakah hian rawlthar duhawm Endrick an la nei cheu bawk. Midfield ah Jude Bellingham pawh a tha viau bawk. Chuti chung chuan Lille an hneh zo lo tlat thung.
Atletico an mualpho
Lille lakah Real Madrid an mualpho rualin Madrid khaw club lian dang Atletico Madrid pawh Benfica lakah an lo mualpho ve bawk a, si li fai ngawtin Portugal club lian lakah an tlawm.
Benfica hian club lian Atletico Madrid lakah bul an tan tha viau a, goal an thun har lo. Kerem Aktürkoglu chuan minute 13-naah hmahruaina goal a thun. He goal hmang hian hun rei tak chhung hma an hruai. Chawlhlawk hnu lamah Benfica an chefuh nawn leh a, penalty an hmu. He penalty hi Real Madrid player hlui Ángel Di María chuan minute 52-naah a pet goal a, an goal hnihna a thun. Di Maria goal thun hnu hian PenAlexander Bah leh Orkun Kökçü ten goal an thun belh zui leh a, an mikhual team lian lakah 4-0 ngawtin hnehna an chang zui ta a ni.
Juventus an chak
Italian club lian Juventus chuan mikhual an nihna hmun Red Bull Arena-ah si phur hmasa mah se hnehna an chang let a, RB Leipzig hnehin point thum an hmu.
RB Leipzig hian minute 30-naa Benjamin Sesko goal thun hmangin hma an hruai. Juventus in chawlhlawk hmaa an si phurh an sut theih loh hnuin second half tan tirh lam minute 50-naah Dusan Vlahovic chuan goal thunin an si phurh a sut. 1-1 a nih hnuin Juventus player Michele Di Gregorio chu minute 59-naah hnawhchhuah a ni a, an dinhmun a chhe hman hle.
An mualah tam zawk an nih hnuin RB Leipzig in goal an thun thuai a, hmahruaina goal thuntu Sesko chuan minute 65-naah penalty atangin hma an hruai nawn lehna goal a thun. Goal an chhuah nawn leh hnuin Juventus in an khingpuite an chhanglet thuai a, Vlahovic chuan minute 68-naah goal thunin an si phurh a sut nawn leh. Hun rei tak chhung goal lut a awm belh theih loh hnuin ‘Francisco Conceição chuan minute 82-naah Juventus chakna goal a thun a, Mimualah 3-2 in hnehna an chang zui ta a ni.
Result dang
Nilai zana inkhel dangah Italian club Atalanta chuan mikhual an nihna hmunah an khingpui Shakhtar Donetsk chu 3-0 in an hneh a. Dutch club lian Feyenoord Rotterdam pawhin mualneitu Girona chu 3-2 in an hneh ve bawk. Nilai zan hi Spain leh Germany tan zan tha a ni lova, UCL a inlan club te an tlawm vek ve ve a ni.