Real Madrid in Barcelona an hnaih

Pathianni zana Spanish La Liga khelhah champion lai Real Madrid chuan an mikhual Getafe chu si hnih faiin an hneh a, hmahruaitu FC Barcelona an hnaih leh zual.
Hmahruaitu FC Barcelona nen an inkar tizim tura chak mamawh Real Madrid hian Santiago Bernabeu-ah table hnuai lama awm mek Getafe an mikhual. An mikhual Getafe hneh ngei tumin tan an khawh a, chawhlawk hmaa goal hnih an thun hmangin hnehna an chang. Los Blancos tan hian season thara khel tha lo Jude Bellingham chuan minute 30-naah penalty a pet goal a, hmahruaina goal a thun. Bellingham hian a khelh that tawk loh vanga sawiseltute chu goal hmangin a chhanglet.
Belligham goal thun hnuin Real Madrid an khel tha chhunzawm a, goal pawh an thun leh thuai. Chawlhlawk dawn hnaih minute 38-naah Real Madrid a zawm hnua beisei phak lo Kylian Mbappe chuan an goal hnihna a thun a, an hmahruaina a tizau. Real Madrid hian chawlhlawk hnu lamah khel tha zui viau mah se goal dang an thun belh thei tawh lo. Mikhual team Getafe in an si phurh rut tur khawpin Real Madrid an nawr tlang thei lo bawk. Hun tawp thlengin goal a luh belh thei tawh lo va Real Madrid chuan an mualah point thum an hmu zui ta a ni.
Real Madrid hian khelh 14 atangin point 33 an hmu a, pahnihnaah an inhlangkai. Real hian an chungchiaha awm FC Barcelona aia khelh khatin an khel tlem zawk mek a. Chuti chung chuan an inhlauhna hi point khat chauh a ni. Real Madrid leh Barcelona te hian kar laihawlah inkhel an hmachhawn ve ve dawn a. Thawhlehni leh nilaini zana result a zirin La Liga hmahruaitu inthlak thei dinhmunah an ding a. Thawhleh zan hian FC Barcelona chuan Mimualah Mallorca an hmachhawn dawn a, table-a hmahruai zui thei turin Mikualah chak ngei an mamawh dawn. Champion lai Real Madrid hian nilai zanah Athletic Club an hmachhawn ve dawn thung a. Barca zim tawt zel turin an ni pawh hian Mimalah chak an mamawh ve dawn bawk.