Real Madrid-in US leilunga La Liga match nghah dodal bur!

Real Madrid-in US leilunga
La Liga match nghah dodal bur!
FC Barcelona leh Villarreal CF chuan kumin December ni 21 La Liga match-a an fixture chu Villarreal khelmual Estadio de la Ceramica atanga United States khawpui pakhat Miami-a an football stadium lar Hard Rock Stadium-a sawn an ngen a, Spanish top flight thuneitu Spanish football federation (RFEF) lamin an lo phurpui surh a, Fifa leh Uefa lamah phalna an dil nghal chuk chuk a, he mi dodaltu hi an lang chhuak nghal tuk tuk a, an zingah hian Real Madrid chu club atanga langsar ber an ni awm e.
Tarlan tawh angin, America rama he game nghah rawtna hi tunkar Thawhtanni khan RFEF chuan ngaihtuahin a pawm hmak a, mahse, fans leh club lam atangin dodalna a richhuak nghal nuai nuai a, Bernabeu club chuan ‘pawm theih loh hul hual’ tiin an sawi!
2026 World Cup match sarih lai thleng tur stadium-a La Liga match nghah leh Spain pawn lama tualchhung league match suanchhuah tumna chu Real hian a na thei ang berin an dodal tih an puang a, “He rawtna hi a kaltlang vaih a nih chuan a sawp chu na tak a ni dawn a, khawvel football mithmuh pawhin a serious hle ang,” an ti.
Spanish football supporters’ association (FASFE) pawhin he rawtna duh lotu Barcelona leh Villarreal fan group pahnihte thlawp zawngin thuchhuah an siam tawh a, katlangpui a nih vaih chuan dan anga an khin ngei tur thu an sawi.
Hetih lai hian Villarreal president Fernando Roig chuan an club website katlangin US-a inkhelh theihna tur hun remchang inhawng mek chu bawhpelh chi a nih loh thu sawiin, an ram football leh Villarreal CF football thli (brand) chu tualchhung maia tawppui loa huang zauh zel tur a nih thu a sawi a, club tam takin international kawtkai thlenga dahchhuah chu an pawm nia sawiin, chu (internationalise) chuan an sum lakluh pawh a tipung ang a, league dang, entirna’n, Premier League han tih angte pawh an hnaih chho zel dawn niin a sawi.
Tarlan tawh angin, Fifa chuan a dan hman laiah domestic league match-te cu ram pawn daiha khelh a phal lo ngei mai a, mahse, nikum mai khan an thu lo tihtluk tawh zirchiangtu tur working group a din a; Fifa pawh hi inphochhuak tam zel duh, Club World Cup mai ni lo World Cup pangngai pawh tihpun chiam chiam duhtu an lo ni a, tualchhung atanga club football han suankual chhuah vel pawh hi an remti a nih pawhin a mak lo mai thei a, chu lai tak chu La Liga club pahnih leh Spanish federation lam hian an chuk zui ta chat ni berin a lang!
La Liga hian nikum pawh khan Barcelona leh Atletico Madrid chu Miami khuaah bawk inkhelhtir a lo tum zuau zuau tawh a, dodalna karah a thu a zuk leh ta mai pawh a!
Record siama La Liga title 36 tehreng hawn tling tawh Real Madrid chuan ram pawna league fixture phochhuah vel hi an intidodal nasa hle rih a, thuchhuah an siamah chuan:
“He competition-in kalphung pangngai a kalpui mekah chuan team tinte hi boruak thuhmun hnuaia inkhel mai tur kan ni a, tuna rawtna ang hi chuan club-te inkarah intluktlan lohna a hringchhuak dawn a, sulhnu chhe tak hnutchhiahin, pawmzam mai mai theih loh tih dan thar chhe zawk tan kawng kan hawnsak lek tihna a ni dawn a, sport kalphung khawng tak kan kenkawh loh chuan he competition (La Liga) hi chichawm zo vek thei dinhmunah a ding dawn a ni,” an ti.
Club thuchhuahin a tarlan zui zel danin, Fifa lam pawh an dilna dawn pawmpui mai lo tur leh La Liga club zawng zawng remtih tlanna la hmasa zet turin an ngen tih an sawi a; Uefa hnenah pawh RFEF chu an dilna hnukkir tura ngen turin an phut tlat tih an tarlang tel.
Hetih lai hian league match pangngai ni lo, match khat khelha tlingtlak mai chi Italian Super Cup leh Spanish Super Cup han tih angte chu engngemaw lai atang tawh khan ram pawna khelh an lo ching tawh a, domestic league tak hi chu ram danga khelh a la ni ngai lo.