Real Madrid zawm tura thutlukna siam Mbappe

Real Madrid zawm tura thutlukna siam Mbappe
Hun rei tak atanga sawizawm lo ni tawh Kylian Mbappe leh Real Madrid chuan inremna an ziak nge nge dawn niin a lang ta a, nimin khan Paris St-Germain striker hian kumin nipui laia Spanish giants zawm a remtih thu khawvel hriatah a puangchhuak ta nge nge.
France captain kum 25 mi hian PSG hnenah kumin June thlaa a contract neih lai a tawp rualin chhuah a duh thu a hrilhchiang ta a, La Liga lama a kal duh thu pawh a nemnghet nghal a, mahse, tun din-hmunah Real-ah hian contract a la ziak lo.
World Cup winner Mbappe hian a club vawn mek tan goal 244 tehreng thunsak tling tawhin, PSG record goalscorer a ni mek.
Mbappe hian Feb-ruary ni 13-a training a tan hma khan kumin March thla hma ngeia a hmalam hun tihfel a duh thu hi a lo sawichhuak tawh a; tunhnaiah PSG president Nasser Al-Khelaifi hmuin hmai-chhanah chhuah a duh thu leh Real zawm a duh thu hi a hrilhchiang nghal a ni.
Karliamta lama media report hmuh theihah Inrinni match-a Nantes game atan khan Mbappe chu starting line-up chantir a ni lo a, mahse, bench atanga lutin penalty goal a chhuihlut leh ta tho a, PSG chuan Ligue 1 table-ah point 14 ngawtin hma an hruai fal tawh a ni.
Spain rama a contract thar tur hi tihfel la ni lo mah se media lam chuan kum nga chhung daih inremna a ziah tur thu leh season khata euro maktaduai 15 (£12.8m) bakah bonus atan kum nga chhunga euro maktaduai 150 (£128m) a dawn tlin tur thu an sawi a, hei bakah hian a thlalak an hralhna man atangin percentage engemawzat a chang bawk dawn a ni.
Real manager Carlo Ancelotti chuan a team-a Mbappe a hmantang-kai dan tur a lo suang-tuah lawk tawh tih sawi-in, England midfielder leifuh zet Jude Belling-ham nen tlarhma lut thuk turah dah a tum a, Brazilian Vinicius Jr chu veilama tlantir tumin, Mbappe pawh a lai rau rauah a veilam a nektir dawn tih a sawi.
Croatia midfielder Luka Modric chu tun nipui thawt rual hian a chhuak ve tawh dawn a, hei vang hian Mbappe chuan a clu tharah pawh France natioal team-a a hak ang number 10 shirt a chang thei dawn a ni.
A khawsakna hmun apianga league title hlawhchhuak thei Mbappe hian PSG a zawm hma khan Monaco chu French title lakpui tawhin, kum 2017 khan rawlthar kum 18 mi lek ni chungin PSG-ah a lut a, a tirah chuan loan-in a kal zet a, a hnuah euro maktaduai 180 (£165.7m)-in an lei zui ta a ni.
PSG tan inelna hrang hrangah game 291 atanga goal 244 a thun tawh bakah assist ngawt pawh 93 a nei tling tawh a, a club chhuahsan mai tawh tur hi Ligue 1 title panga a lakpui tawh bawk.
2021-22 season tawp rual pawh khan Mbappe hian free transfer-a PSG chhuahsan a lo tum tawh a, mahse, kum hnih chhung atan a contract a pawtsei leh ta zawk a, tah chuan kum khat dang contract la pawhsei leh theihna bilh tel a ni.
Tunah chuan Real Madrid thuam a inbel ve tak tak tawh dawn niin a lang a, Cham-pions League trophy pawh tha tharin a beisei thei tawh ang chu!