Real nena sawizawm Klopp!

Liverpool manager hlui Jurgen Klopp chuan an ram Germany leh England-a league title a lak ve ve hnuah management lam a chawlhsan ta vang vang rih a; kumin nipui thawt lai hian team enkawl lama kirleha Real Madrid zawm tur angin thu a thang mek a, he mi chungchang hi belhchian dawl lo tiin a sawifiah a, coaching hrim hrim erawh a luhchilh leh mai thei tih a tarlang tel.
Kum 58 mi German coach hi season thara Alvaro Arbeloa thlaka Bernabeu office pui luah tura sawirik zingah an boss hlui Zinedine Zidane nen an langsar ber rih a, mahse, Real head coach ni tura inbiakna kalpui anga an sawi chu a pha hul thak thung.
Klopp hian 2023-24 season tawp ruala Anfield a chhuahsan hnu khan tun thlengin club vawn a nei leh ta lo vang vang a, Red Bull tan head of global football hna tih vel a chelh thung.
Tunhnai Munich khuaa Magenta TV World Cup team tlangzarhnaah Real Madrid nen sawizawm a nih chungchang an zawhna chhangin German pachal chuan reporter rual hnenah, “Real Madrid-in min phone a nih chuan hriat tawh awm tak a ni. Chuvangin, he thuthang hi chu belhchian dawl lo a ni a, vawi khat te pawh min la rawn phone eih lo. Ka agent pawh a awm reng a, in duh chuan in zawt thei ang chu. Ani pawh hi an la phone lo.
“Tun dinhmunah tak chuan coaching lam hi ka ngaihtuah lo a, ngaihtuahna tur chhan pawh ka nei lo,” ti chungin coaching chawlhsan hlen tur erawh chuan a kum pawh a la upa tawk lo tih a sawi a, a hmalam hun atan ruahmanna felfai tak la nei chiah lo mah se kum han kal leh deuh se engnge lo thleng dawn tih erawh a sawilawk theih bik loh thu a tarlang tel.
October 2015 khan Klopp hi Liverpool boss ni tura lakluh niin, an inremnaah chuan a contract hi kumin thleng daih tur a ni a, mahse, January 2024 khan Liverpool tantute tana phut zawkna tur thuchhuah siamin, 2023-24 campaign zawh ruala a ban tur thu a puang a, contract a hman zawh loh tur chhan pawh chakna thahrui a nei tawh lo niin a sawi!
2019-20 season khan Klopp-a hnuaiah Anfield club chuan kum 30 chhunga a vawi khatna atan league title an hlawhchhuak nawlh a, chu mi hma chiah kum 2019 khan Reds boss ni chungin Champions League trophy a chawi bawk.
Liverpool a enkawl chhungin FA Cup bakah League Cup pahnih, Uefa Super Cup leh Fifa Club World Cup a lakpui bawk.
Chuti taka England-a hlawhtling chu ni mah se a contract tawp hmain a chhuak thut a; tunhnaiah coaching-a kirleh lam sawibo lo mah se kum hnih kaltaa thuchhuah a lo siam tawh en chuan Premier League club dang a enkawl hmel loh.
Chu mi tuma a thusawi chu hei hi a ni: “Chiang taka ka sawi theih chu England-ah hian Liverpool tih loh eng team dang mah enkawl ka tum lo. Chu chu 100% a ni. Thil theih a ni lo.”
Klopp hian England a pan hmain an ram Germany lamah Mainz 05 leh Borussia Dortmund enkawl tawhin, Dortmund phei hi chu kum 2011 leh 2012 khan a zawnin Bundesliga title a lakpui ngat a ni.