Real tana goal thun nghal Bellingham
England midfielder Jude Bellingham chuan a club thar Real Madrid tana competitive match a khelh vawi-khatnaah goal khung nghalin, Inrinnia La Liga season thar bul an tannaah Spanish giants chu Athletic Bilbao lakah 2-0 hnehna a chanpui.
Kum 20 mi Bellingham hi Bernabeu club chuan kumin nipui thawt lai hian Borussia Dortmund atangin pound maktaduai 88.5 ngawtin an leichhuak a; Inrinnia a La Liga debut minute 36-naah goal thunin, kum 2007 daih tawha goal khung David Beckham hnu lama English player zinga Real tana goal thun leh thei hmasaber a ni.
England leh Manchester United midfielder hlui Beckham pawh khan Real tana a league debut-ah kum 2003 khan goal a lo thun ve tawh bawk.
San Mames inkhela Madrid goal hmasa zawk hi minute 28-a Rodrygo tihluh niin, Carvajal Ramos siamsak a ni a; Bellingham-a goal kha Alaba chhawpsak a ni thung.
Real pre-season friendly match pali kha Bellingham hian khel kim vekin, Texas lama Manchester United laka 2-0 hnehna an chan tumin goal a lo khung tawh bawk.
Madrid manager Carlo Ancelotti chuan Bellingham fakin, naupang duhawm lutuk a nih thu leh thawkrim, kum heti leka a theihna leh nungchang dik pholang der tawh anih thu a sawi a, a club tharah chuan a phurin, player lei thar pawimawh chungchuang a nih thu leh a lo awm tawhsate pawhin an phur phah sauh niin a sawi a, bul an tanna inkhela goal an chhuah lo leh hneh taka inkhel an thunun thei lawmawm a tihzia thu hahipin a sawi.
Season liamta khan Real Madrid hi La Liga lamah runners-up niin, cham-pion Barca lakah point 10-in an hnufual.
Saudi Arabia lama an hmatawng rinrawl ni rei tak Karim Benzema kalbo hnuah Bellingham hi Real tlarhma lama Rodrygo leh Vinicius Jr thlawptu langsar ni chho nghal tura ngaih a ni a, 4-4-2 formation thar hmangin season tharah hian Madrid-in Catalan team kut atanga La Liga title chhuh an tum dawn niin a ngaih theih.
Inrinni zan inkhel second half lamah pawh Real hian inkhel thunun hneh hle mah se an goal hnih hum tawh belhchhah tura an hun tha neih goal-ah an chantir zo tlat lo.
Chawlhlawk hnua khelmual an luh leh hnu lawkah an defender Eder Militao chuan khup veilam hliam avangin khelmual a chhuahsan a, a hliam dinhmun hriat theih a ni rih lo.