Record siamin Billboard 200-ah Taylor Swift a No.1

Record siamin Billboard 200-ah Taylor Swift a No.1
Taylor Swift re-recorded album ‘1989 (Taylor’s Version)’ chu Billboard 200 (albums) chart-ah No.2 atangin No.1 a kai thar leh a, he chart-a kar thum a No.1-na a ni ta. He album hi November thla tir chart-ah khan No.1-ah a debut a, a zawna kar hnih a No.1 hnuah No.2-ah kar hnih tawlhin, tunah a rawn No.1 thar leh ta a ni. Hetihrual hian Taylor Swift hian chart record a siam a, tunkar chart top 10-ah a album panga a lang thawt mai a, zaithiam damlai zinga hetiang tithei awm chhun a ni.
Billboard 200 chart hi kar khat chhunga US-a zaithiam lar dan tehna niin, album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming leh album-a hla mal hralhna atanga album tlukpui te belhkhawm thin a ni.
‘1989 (Taylor’s Version)’ hian 1,41,000 an hralh leh thei a, chu chu chart No.2 atangin No.1 a kaipui leh ta a ni. |um khata chart top 10-a lang thei album panga nei thei zaithiam dang awm chhun chu Prince a ni a, ani hi May ni 14, 2016-a a thih hlimchhawnah khan a album The Very Best of Prince (2), the Purple Rain soundtrack (with The Revolution;(3), The Hits/The B-Sides (4), Ultimate (6) leh 1999 (7) te chart top 10-a lang thei a ni. Prince hi chuan a thih hnuah hetiang hi thlentir chauh a ni a, Swift hi chuan a damlai ngeiin hetiang hi a thleng thei thung a ni.
Michael Buble Krismas album hlui, chart No.1 te pawh lo ni tawh ‘Christmas’ chu No.24 atangin No.2-ah a invawrh thar leh a, he album hi 2011-a a tlangzarh kha niin, a tlangzarh hlimah hian kar 5 chhung a No.1 a, kumtin Krismas vuakvetah chart top 10-a a rawn lang thar leh ta ziah a ni.
Chart No.1 hlui Drake ‘For All the Dogs’ chu 85,000 hralh lehin No.1 atangin No.2-ah a tawlh a, chart No.1 hlui Taylor Swift ‘Midnights’ chu 65,000 hralh lehin No.6 atangin No.3 a kai thar leh a, chart No.1 hlui bawk Morgan Wallen ‘One Thing at a Time’ chu 63,000 hralh lehin No.5 atangin No.4 a kai thar leh a, chart No.1 hlui Taylor Swift ‘Folklore’ chu 60,000 hralh lehin No.9 atangin No.5-ah a invawrh thar leh ta bawk.
Chart No.1 hlui bawk Taylor Swift ‘Lover’ chu 53,000 hralh lehin No.8 atangin No.6-ah a invawrh thar leh a, chart No.1 hlui bawk SZA ‘SOS’ chu 48,000 hralh lehin No.10 atangin No.7-ah a invawrh thar leh a, chart No.1 hlui bawk Olivia Rodrigo ‘Guts’ chu 47,000 hralh lehin No.14 atangin No.8 a kai thar leh a, Michael Buble ‘Christmas’ chu 46,000 hralh lehin No.24 atangin No.9-ah a invawrh thar a, chart No.1 hlui bawk Taylor Swift ‘Speak Now (Taylor’s Version)’ chu 46,000 tling lo deuh hralh lehin No.17 atangin No.10 a kai thar ve leh ta bawk.