Record siamin “Bohemian Rhapsody”-in 2B view kai; Rihanna “Only Girl (In te World)” pawh 1B view

Record siamin “Bohemian Rhapsody”-in 2B view kai; Rihanna “Only Girl (In te World)” pawh 1B view
Veteran band Queen 1975 hla hit ‘Bohemian Rhapsody” music video chuan YouTube-ah vawi tluklehdingawn hnih en a hlawh ta a, YouTube-a hetiang zat en hlawh thei music video zinga hla upa ber a ni. Hetihrual hian Rihanna hla “Only Girl (In the World)” music video pawhin vawi tluklehdingawn en a hlawh ve ta bawk.
Queen lar vanglai kha chuan YouTube a la awm lo a, khawvelin internet kan la hmelhriat hma a ni. YouTube hi streaming platform lian tak a ni ta a, zaithiamte tan pawh an music video-in YouTube-a en a hlawh tam dan chu an hla leh video a hit leh hit loh tehna pakhat a tling ta a, he streaming platform-a music video vawi tluklehdingawn en hlawh thei neih hi zaithiamte tan mellung pawimawh a tling tawh a ni.
Veteran tan chuan YouTube-a vawi tluklehdingawn en hlawh thei video neih hi a sak talh tawh a, an hla lar vanglai a pelh tawh miau avang leh thangthar ten an rimawi an tuipui tawh loh miau chuan view ngah hi a harsa tawh tlat. Hetiang kara ‘Bohemian Rapsody’ music video vawi tluklehdingawn hnih en a hlawh thei hian e hla ropuina hi a belhchhah tlat.
‘Bohemian Rhapsody’ hi an tlangzarh atanga kum 50-ah tluklehdingawn hnih view a kai thei a, YouTube history-a hetiang zat view kai thei upa ber a ni. He hla, minute ruk vel zet sei hi 1975-a an album ‘A Night at the Opera’ atanga an lead single a ni. A music video hi Bruce Gowers direct a ni.
Rihanna ‘Only Girl (In the World)’ music video hi 2010-a a tihchhuah niin, Anthony Mandler direct a ni a, a hla hi a lar vanglaiin Billboard Hot 100 (US singles) chart-ah No.1 a kai a, kum 15 hnuah vawi tluklehdingawn en a hlawh thei ta a ni.
“Only Girl (In the World)” hi Rihanna music video YouTube-a vawi tluklehdingawn en hlawh thei 13 a ni ta a, YouTube-a hetiang zat en hlawh thei video nga berte zingah a tel. He hla hi a studio album pangana ‘Loud’ atanga a lead single niin, 2011 Grammy Award-ah best dance/electronic recording a dawnpui nghe nghe a ni.