Record siamin Nicks an chak

Ningani khan NBA Regular season khelh chhunzawm a ni a, The New York Knicks chuan an khingpui Brooklyn Nets chu point 54 zetin an hneh a, an club chanchina an chak chian ber record thar an siam. Chiang zeta Knicks an chak lai hian Milwaukee Bucks an tlawm ve thung.
New York Knick hian an khingpui Brooklyn Nets te hi an ngam viau a, quarter hmasa berah point 18 zetin an chungnung nghal. Quarter khatnaah point 18 zeta an chungnun hnuin quarter hnihnaah an khel tha chhunzawm a, point liin an chungnung zui leh a, point 22 zeta hmahruai chungin chawlhlawk an hmang.
Chawlhlawk hnu lamah insiamthat tum viau mah se Brooklyn Nets an insiamtha thei chuang lova, Knicks bawk an chungnung zui leh. Knicks hi quarter thumnaah point 10 zetin an chungnung leh a, quarter hnuhnung ber an hmachhawn dawn meuh chuan point 32 in hma an hruai fal der tawh.
An chak ngei dawn a ni tih chiang tawk viau mah se Knick an inthlahdah duh chuang lo. Chiang zawka chak tumin tan an khawh zui zel a, quarter hnuhnung berah point 22 zetin an chungnung leh ta mai a, Nets lakah hian 120-66 a chakin club record thar an siam ta hial a ni.
New York Knicks hi NBA-a an chak chiang ber chu 1946-ah point 48-a an khingpuite an hneh kha a ni a. An club record an khum theih loh ngar ngar hnuin ningani khan point 54 ngawtin Brooklyn Nets an hneh a, point 6 in club record an khum a. Club record thar an siam tum hian vawi li an tlawm zawn lai an titawp chiah bawk.
Ningani zinga inkhel dangah Milwaukee Bucks chu an khingpui Oklahoma City Thunder lakah lakah an chak zo lova, point 122-102 in tlawm zawkah an tang.