Record thar beisei Djokovic leh Murray an thawkdun ta…

Record thar beisei Djokovic leh Murray an thawkdun ta…
Grand Slam title la hnem ber a nihrualpui mek Margaret Court kalsana major title 25 lak tlin a tumna kal zelah Serbia superstar Novak Djokovic chuan trainer atan British number one ni thin Andy Murray a ruai a, nimin atang khan tennis star lian pahnih hi khelmualah an practice dun tan.
Tun thla tawp lama khelh tan tur Australian Open inbuatsaihna pakhat Brisbane International-ah karliamta Ningani khan top seed Djokovic hian 6-3, 6-3-a veteran ve bawk Gael Monfils hnehin quarter-final a lut a; he tournament-ah hian champion se a career-a ATP Tour title 100 la tling ve tawh tur a nih laiin straight-set (7-6 (8-6) 6-3) hmangin big-serving American Reilly Opelka chuan a hnawtchhuak a, title lak kawnga century siam thei pahnih Roger Federer (103) leh Jimmy Connors (109)-te hnung a zui zo leh ta rih lo a ni.
24-time Grand Slam winner Djokovic hi January ni 12-26 chhunga Melbourne khawpuia khelh tur Australian Open-a a champion chuan kum khat chhunga Grand Slam tournament hmasaberah hian vawi 11 a champion tling dawn tihna a ni a, a career-ah ATP title 100 la tling bawkin, a ropui ber tur Grand Slam title 25 hawn tling thei awmchhun niin record khum mai mai harsa tawh tur a siam pah bawk ang.
A hmachhawp hraw tak tak puitlin tur chuan coach atan tu dang ruai loin Grand Slam final-a vawi sarih ngawt a lo hmachhawn tawh leh a thian tha tak ni bawk Briton Murray a thlang a, nikum November thla khan inremna siamin, Thawhlehni khan khelmualah an inlan dun ta a; kartawp Pathianni atanga khelh tan tur Australian Open-a an thawkdun tur hian mi ngaihven pawh a hlawh hle a ni.
Djokovic leh Murray hi kum 37 mi ve ve niin, ni sarih chiahin an inthlau a; three-time major winner Murray hian nikum August thla Paris 2024 Olympic Games zawh rual khan professional tennis khelh a bansan a, Olympic champion Djokovic leh hun rei tak coach atana a rawih tawh Goran Ivanisevic an inthen hnuah Serb nena thawkdun turin inremna an siam ta a ni.
Tun hi tennis khelh a chawlhsan hnua world number one hlui Murray-a coaching hna hmasaber niin, Melbourne Park-ah hian mipate zinga Grand Slam title 24 la tling thei awmchhun Djokovic a champion-pui thei a nih chuan a coaching career-ah hlawhtlinna lian a tawngbaw nghal tiin a sawi theih ang!
A kum 38 tlin lawm tura thla li chauh nghah ngai tawh Novak Djokovic hian nikum khan Grand Slam title pakhat te mah a sualchhuak zo ta lo tlat a, kum 37 mi ni tawh chung hian a beisei record ropui hi a hlawhchhuak thei meuh ang em tih hi zawhna lian a ni mek.
Open era tennis-ah kum 57 chhungin Grand Slam singles title la thei upa ber a ni mek a, Grand Slam title 24 la tling ve tawh awmchhun dang Margaret Court-i nena an record intawm hi a thawhsan thei a nih chuan tennis player piang chhuak tawh zawng zawng zinga ropui ber (GOAT)-ah a puan ngamin a rinawm!
Grand Slam-a vawiruk champion ve tawh Stefan Edberg khan BBC Sport hnenah Djokovic-a tan record malkhalh turin Australian Open a nih loh chuan tawnhriat a neih thatna dang Wimbledon chu ‘chance’ tha ber ni tura a ngaih thu a sawi.
Tarlan tawh thin angin, nikum kha kum 2017 hnu lama Djokovic-a’n major title a lak zawh loh vawikhatna niin, kum 2005 hnua ATP title pakhat em pawh sualchhuak zo loa kum a tluan vawikhatna ni tel bawk mah se Paris final-ah tennis big four hun a liam mek laia tennis star lian rawn ni chho mek Carlos Alcaraz hnehin nikum vek khan Paris-ah Olympic gold medal a awrh a, chawlhkar thum kalta Wimbledon final-a a ngam loh Spaniard lakah phuba lain, a khup hliam zai a nih atanga thla hnih hnu lekah Olympic champion a ni thei a, a trophy khawl bawma a la dahluh loh awmchhun ni reng thin Olympic gold a neih leh tak hnu hi chuan mellung thar phun tur tam a nei tawh lo!