Red Sea lawng kawngin nghawng thui

Khawvel shipping company lian ber ber tena Red Sea an paltlang duh loh avangin global supply chain chuan a tuar nasa hle tawh a.
Red Sea-a lawng kalte Yemen a Houthi rebel tena an beih thin avangin khawvela lawng kawng pawimawh ber pakhat hi shipping company lian te chuan an zawh duh lo a ni.
Houthi group te chuan Hamas an thlawp thu puangin an lawng beihte chu Israel pan tur ho an ni tiin a sawi a, mahse, an lawng beih te chu Israel pan tur te chauh an ni hauh lo thung.
Red Sea-a US leh UK naval forces te chuan Houthi te hi Yemen rama an inkulhna hmun te chu missile hmangin an bei ve thung a ni.

Eng nge thleng?
Houthis te chuan October thlaa Israel-Hamas indo tan atang khan Red Sea-a lawng kalte chu an bei tan tawh a.
Houthis te hi Iran thlawp niin Bab-al-Mandab, 20 miles a zau African lama Eitrea leh Djibouti daidang tu leh Arabian Peninsula a Yemen daidangtua ram dang lawng kalte chu Iran siam drone leh rocket-te hmangin a bei thin a ni.
He lawng kawng hi lawng te hian chhim lam atangin Egypt a Suez Canal pawha hmar lama kal nan an hmang thin a ni.
Houthis te chet lakna avang hian khawvela shipping firm lian ber ber Mediterranean Shipping Compnay leh Maersk te ang chuan zawh duh lovin a kawng kual zawk Africa a Cape of Good Hope lamah an hel ta thin a ni.
BP te pawhin Red Sea paltlanga oil an phurh thin zawng zawng chu an titawp vek a. Africa lama kal kual hian ni 10 hman belh ngai niin company te chuan dollar million tel tak meuh meuh an hloh phah thin a ni.

Eng vangin nge he lawng kawng hi a paiwmawh em em?
Indian Ocean atanga Suez Canal paltlang lawng te chuan Strait of Bab al-Mandab leh Red Sea an paltlang ngei ngei a ngai a.
Suez Canal chu Asia leh Europe inkal pawhna rang ber niin a bik takin oil leh liquified natural gas (LNG) phurh nana pawimawh lutuk a ni.
Kum 2023 kum chanve chhung khan Suez Canal hi oil nine billion barrel velin a paltlang tiin freight analytics firm Vortexa chuan a sawi.
S&P Global Market Intelligence analysts te chuan Europe, Middle East leh North Africa a bungrua chawk luh 15% vel te chu Asia leh tuipui Gulf atanga chawkluh a ni, an ti a. Chung zingah chuan refined oil 21.5% leh crude oil 13% chuang a tel an ti.
Oil ringawt a ni lo va, Container ship te chuan consumer goods hrang hrang TV, bungrua, thuamhnaw leh sports bungruate pawh an phur thin a ni.

Consumer te a nghawng dan?
Red Sea-a lawng an kal that ngam loh avangin loh theih lohin supply chain-in a tuar nghal a, a tuar nasa ber chu consumer goods te an ni, tiin Chris Rogers, head of supply chain research, S&P Global Market Intelligence chuan a sawi a.
Lawng tena kawng kual zawk 3,500 nautical miles vel lai Cape of Good Hope an zawh chuan an thil phurh te chu a thleng har lo thei lo a ni.
Funiture giant Ikea leh UK retailer Next te chuan shipping in harsatna a tawh zel chuan an product supply-in a tuar zel dawn an ti a.
Tesla te pawhin supply tihbuai avang hian European electric car factory a manufacture chu an titawp lailawk tawh bawk.
Kawng kual zawka kal chuan bungrua man a ti to lo thei lo bawk. Supply chain adviser Drewry te chuan 40ft container hman man chu kar kalta mai khan 15% in a to nghal a, chuvang chuan thil man a to zual lo thei dawn lo tih a ni bawk.
Harsatna a awm zui zel chuan oil man a san phah tura ngaih a ni bawk a. Oil chu car fuel pawimawh a nih avangin a man a san chuan inflation a sang ngei ngei bawk.
Tuipui kaltlang loin bungrua phurh theih tho a ni a, chumi tur chuan Rel hman theih a ni. Mahse, Rel hman a nih dawn chuan Russia paltlang a ngai dawn a, Russia chu Ukraine a run avanga hrek mek a ni bawk si a ni.

Eng tiangin nge hmalak a nih?
US chuan nikum December thla khan Red Sea route humhim nan international naval operation a kalpui tan a.
US chu ram hrang hrang UK, Canada, France, Bahrain, Norway leh Spain ten an zawm zui nghal bawk a. Tichung chuan shipping company thenkhatte chuan Red Sea a kal an la duh chuang lo.
Maersk te chuan Red Sea a an kal duh tawh loh hnuah security operation kalpui a nih hnuah an lawng te an kaltir leh zet a, mahse, Houthis tena an lawng pakhat an beih zinga a tel hnuah an kal chhunzawm duh ta bik lo.
US leh UK naval forces te chuan Red Sea beitu Yemen a Houthi rebel te beihlet hna an thawk zui ta mek a ni.