Referee hnek vangin Koca an hrem

Karliamta Thawhtanni Turkish top-flight inkhel pakhata MKE Ankaragucu leh Caykur Rizes-por inhnehtawk tuma referee Halil Umut Meler biangki tak maia a hnek siah avangin Ankaragucu president Faruk Koca chu football kaihhnawiha inhnamhnawih tawh lo turin Turkish Football Federation (TFF) chuan a hnawtchhuak.
Koca kha khelmual chhung-ah tlanlutin Meler kha a va lawk thuai a; referee chu leiah tlu nghalin, a biangki a vung ul a; damdawi ina hun rei vak lo enkawl a nih hnuah Nilaini khan chhuahtir leh nghal a ni.
A thiltih avang khan police lamin Faruk Koca man zui nghalin, court-a hruai a nih hnuah Justice Minister Yil-maz Tunc chuan Koca leh midang pahnihte chu public official-te an hliam avanga man an nih thu a puang.
Kha thil thlen hnu khan TFF chuan Thawhtannia Turkish league football match khelh lai leh hmabak la zawng zawng chu khelh rih loh phawt turin thuchhuah a siam nghal a, chawlhkar khat an chawlh hnu December ni 19, karleh Thawhlehnia chhunzawm turin rem an ruat fel.
Turkish Football Fede-ration hian Koca hremna lailawk tichhuakin ‘suspend order’ an tichhuak zet a, hremna tak tak zawk an tichhuak zui leh ta a ni.
An mi leh sate an thunun zawh loh avangin Ankaragucu club pawh an ram pawisa lira maktaduai hnih chawi turin an hrem nghal a, chu chu £54,000 hu niin, sum chawitir bakah hian fans tel loa home game vawi-nga hremna pek tel an ni.
Kut tuar Halil Umut Meler kha kum 37 mi niin, Turkey’s top referee zinga pakhat a nih bakah Fifa pawhin interna-tional game hrang hrang en-kawl tura a hman mek zinga mi a ni a; Uefa referee tha bik rual (elite referee list) zingah a tel pha bawk.
Chutiang referee laka kut a thlak ngawt avang khan Koca chuan Ankaragucu club president nihna a bansan thu a puang tawh a, a chet dan avang khan thupha a chawi nghal bawk.
Faruk Koca chuan offi-cial-te tihsual leh hleih neihna chu engtiang taka lian leh nasa pawh ni se khati anga an laka che tur a nih loh thu leh tharum thawhna kha sawi-mam ngaihna awm lo a nih thu sawi chungin Turkish refe-reeing community, sport hrim hrim leh an ram pumpui chungah ngaihdam a dil zui nghal a; a chet dan kha pawm-zam theih lohni bawk mah se Turkish football-a tharum thawhnain nghet taka zung a kaih tlat pholanna ni tura a beisei thu a tarlang tel.
Fifa president Gianni In-fantino pawhin kha thil thleng kha demin, engti kawng zawng maha pawm theih loh a nih thu leh tharum thawhna chuan an buaipui mek sport mai bakah society-ah hmun a chang tur a ni lo tiin a sawi.