Reform bill vangin Argentina buai

Argentina Senate chuan libertarian President Javier Milei economic reform plan a pawm fel ta a, chutihlai chuan parliament pawnah bill duhlohna lantirna nasa tak neiin police te nena inbeihna a thleng thung.
Reform plan bill avangin upper house chu a inthen hrang phawt a. Mahse, Vice President Victoria Villaruel in reform duh zawnga vote a thlak avangin 37-36 in a tlang ta a ni.
Bill pawm a nih hma hian debate rei tak neih niin senators te chuan he reform bill a article hrang hrangte investment tihsan a nih theih nana state entities te privatise a, sumdawng te hnena incentive sang tak tak pek tumna chu a mal te tein an vote leh dawn a ni.
He bill hian April thla khan lower house chu a paltlang mai a, tunah erawh Senate in a siam danglam hnuah lower house pawm leh turin pek let leh a ni dawn a ni.
“Argentinians chi hnih kan awm” tia sawiin Villaruel chuan reform thlawp zawnga a vote thu a sawi a. “Argentina tharum thawhna car te hal a, lung te vawma democracy kalpuitute leh Argentina dang hnathawktuten hrehawm taka thil thlakdang lam duha vote thlaka nghak te an ni,” tiin a sawi.
Milei sorkar hian house chamber pahnihah majority an nei lo ve ve a, chuvang chuan reform bill tlang nan an thawhpui te thlawpna an hmuh ngei ngai a ni a. An bill pharh chu thlak danglam a ni lo thei dawn lo tih hrerengin mahse an tum ber chu kaihher a nih loh an beisei bur thung.
Left-leaning Peronist opposition bloc te unions te nena inzawmna nghet tak nei te chuan economic reofrm bill a a bulthut a ‘bases’ bill chu thlawp lo thungin, fiscal pakage dang te chu vote hmanga la chinfel chhunzawm tur a ni thung a.
He bill hi Milei-an Argentina economy siam that leh nana tihmakmawha a ngaih niin Argentina-ah hian inflation a sang hle a 300% ni mekin Milei chuan public firm te privatise leh president hnenah special power peka investment tihsan a nih theih nana hmalakna tura thuneihna sang zawk pek a duh bawk.
Mahse, lungawilohna lantirtute chuan reform bill chuan unemployment nasa zawk thlenin consumer price a tisang nasa dawn an ti ve thung a.
“Argentine-te nun derthawngah a ding mek a ni. Inflation awm lo leh economic activity awm si lo tûr hi tum tam kan in tawh” tiin lungawilohna lantirtu social leader Luis D’Elia chuan a sawi a. “Heng tûr hian Argentina tum tam a tihlawhchham tawh a, kalpui zel kan remti tawh lo,” a ti bawk.
Buenos Aires khawpuiah chuan reform bill duhlohna lantirnaah tharumthawhna chhuakin car te hal a ni a, lung te nasa taka vawm niin police te nena inbeihna thlengin tear gas te water house leh rubber bullets te hial hman a ni bawk.
Milei office erawhin bill pawm a ni chu lawmawm an tih thu a sawi thung, “Zanina thil thleng hi Argentine mipuite tana chakna a ni a, kan ropuina nei let leh tura penna pawimawh a ni” tiin thuchhuah siamah tarlan a ni.
Milei hi brash economist leh pundit hlui niin tun hma pawhin lawmaker te nena thu inkalh nei fo niin Congress pawh ‘sazu bu’ tihiala sawi tawh a ni a. Tuna a economic reform bill chu tihmakmawh tia sawitu a ni.
“Argentina kan thlak danglam dawn a, liberal Argentina kan siam dawn” tiin Milei chuan a sawi a.
Bill pawm a nih hma pawhin a reform bill chu a tlang lo a nih chuan kum 2025 ah a thara a tlang theih nan a put luh leh tho tur thu a lo sawi lawk tawh a ni.