Refugee zinga Paralympic medal la hmasaber Afghan Zakia Khudadadi

Refugee zinga Paralympic medal la hmasaber
Afghan Zakia Khudadadi
Refugee Paralympic Team member zinga mi Zakia Khudadadi chuan Ningani khan Taekwondo women’s K44-47kg Repechage fight-ah Turkey player Nurcihan Ekinci hnehin bronze medal a sualchhuak a, refugee team atanga athlete kan hmuh tawhah Paralympics medal awrh hmasaber a ni.
Grand Palais, Paris-a a inlan hmain Khudadadi khan kum thum liamta Tokyo khawpuiah a Paralympics debut a lo nghakchhuak tawh a, Japan rama a hlawhchham hnuah a inhumhimna Paris khawpuiah ngei K44-47kg category huang atanga bronze medal awrhin refugee team tan record thar a siam ta a ni.
Afhghanistan atanga US sipai an chhuah zawh hnua Islam sakhaw la firfiak pawl Taliban-in Kabul an thunun leh hnu khan an ram khawpui tlanchhuahsanin Afghan mipui tam takin ram pawn an bel a, chu’ng zingah chuan kum 25 mi Zakia Khudadadiram pawh hi telin, a tlanchhiatna France chuan humhimna (asylum) an lo pe a, duat taka enkawlin, chu ramah ngei chuan Paralympics medal a awrh a; a coach Haby Niare pawh hian kum 2016 khan Rio Olympics-ah taekwondo silver medal a lo awrh ve tawh bawk.
Los Angeles lama Paralympic Games thlir zui leh nghal Khudadadi hian silver medal-a tawp a tum loh thu leh zalenna thuchah puangdarh zau lehzual tura gold medal awrh ngei a duh thu a sawichhuak.