Rehabilitation Centre ram hungna bang siam mek MSPMC-in endik

Mizoram sawrkar hnuaia development works hrang hrang endik tura din, Mizoram State Project Monitoring Committee (MSPMC) chuan an vice chairman R Lal Rinawma, IRS (rtd) kaihhruaiin Ningani khan Maumuala ‘Construction of Brick Wall Boundary Fencing (Block-1&2) at Protective Home’ hna thawh mek chu an endik.
MSPMC vice chairman chuan State Social Welfare & Rehabilitation Centre tia thlak tak hmunhma hungna atana sak – leirawhchan hmanga bang siam mek leh zawhfel tawhte chu an endik chinah tha an tih thu a sawi a. Hmachhawp la awm pawh tha taka kalpui zel a nih ngei an beisei tih a sawi a ni.
He project hi Article 275 centrally sponsored scheme atanga sum hmuh niin, Social Welfare Department enkawlna hnuaia awm a ni a. Tunah hian phase-I funding-a hmalakna chu zawh tawh niin, phase 2 hi chhunzawm leh tura ruahman a ni. Hna enkawltu zingah technical mi 5 awmin endiknaah hian engineer pahnih an tel tel ve a ni.
MSPMC hi team thum – A, B leh C a then niin, team tinah hian mithiam sawm bik bakah political party aiawh bakah NGO aiawh te an tel zel a. Tun tumah hian Team C member-ten tawiawmin, an ni bakah hian MSPMC secretary Er Vanlalruata Sailo, Planning & Programme Implementation principal adviser Dr Lalrinchhana leh Chanmari West Local Council chairman PC Lalawmawia ten an tawiawm tel a ni.