Reiek-in mi hmingtha chawimawina lung phun

Reiek khawchhuak mi langsar mi 31-te chawimawina lungphun chu Inrinni khan MP K Vanlalvena’n a hawng.
Rajya Sabha MP LADS 2021- 2023 fund Rs. 12,50,000 hmangin Reiek Tlang Lungdawhah India leh Zoram khawvela Reiek khua mi hmingtha – IAS, IFS, MCS, professor, politician, writer leh hlaphuah thiam leh zaithiam bakah a dangte, langsar mi 31-te chawimawina lung an phun a. YMA Reiek Branch-in a phun buaipuiin, an zinga dam tawh lo te chu an chhungte sawm an ni.
MP chuan lungphun hi Reiek khawchhuak, MNF vice president Pu Lalthlengliana ex- MLA leh Reiek khawtlangte thawhrimna zara tihhlawhtlin a ni tih a sawi a. Reiek chu IAS, MCS, professor, hla phuah thiam leh zaithiam, Zoram tana mi hlu tak tak an lo chhuak chu ropui a tih thu a sawi. “Heng lungphun hian Reiek khua zirlai ni mekte thinlung chawh chhuah nan leh siamthar nan hmang se ka duh a ni,” a ti.
Chawimawite zinga tel ve, Lalthlengliana ex-MLA pawhin Reiek hi Indopui laia captain pathum nei thei awmchhun, IAS pali ngawt nei an ni bawk tih sawiin, “Khawvelah chhulkhat chhuak IAS pathum nei thei awmchhun kan ni,” a ti.