Rel kawng leh a kaihhnawih…

Hmasawnnain min luhchilh thuk zel a, tunhmaa kan hriat ngai loh, rel kawng chungchangah district thuneitute thupek chhuah hriat tur a awm chho ve ta a; a la awm chho zut awm e.
Kolasib District Magistrate chuan, Kolasib district huam chhunga Bairabi leh Mualkhang inkara Railway acquired area huam chhungah thlam, buk, puan in, thingpui dawr etc. siam a khap a. Rel kawng lai tak atanga teh a, ding leh vei lam feet 50 (metre 15) ve ve humhalh a ni, tiin.
Kan hriat angin, Mizoramah hian kawngpui dunga eizawnna hi kan innghahna ber pakhat a ni awm e. Khaw kar kawng remchang laiah restaurant te, hotel te kan din thluah a, huan thlai leh thei chi hrang hrang kan zuar bawk a. Khawpui chhungah ni se, kawngpui dung tluanin dawr chi hrang hrang kan hung khat tlat a, dawr kawt lamah, dawr leh dawr inkarah te, kea kalna tur laiah te, hnephnawl leh tlereuh zuar an inzep teuh bawk a. Lirthei hmanga thil zuar an awm bawk a. Kawngpui dung hi sumdawnna hmunpuiah kan chhuah chu a ni ber. Kawngpui laih thar a nih pawhin, ‘kan khua a paltlang loh chuan’ tiin hnathawktute hna thawk thei lovin kan dang thul. Mizoramah chuan kawngpui hi a hlu zual bik a tih theih awm e.
Rel kawng erawh hi chu, station chauha ding thin a nih avangin motor kawngpui anga kawnglak khawi lai emawa sumdawnna/eizawnna lo din a rem teh teuh lo maithei; chutih laiin, ranvulh leh ramsa erawh ven an ngai tel awm e. India ram hmun dangah pawh an lo kalpui mek, ranvulh leh ramsaten rel kawng an tihbuai lohna turin fencing an siam thin a. Mizoramah pawh hian ranvulhtute awareness tha tak kan pek a ngai awm e.
Sairang thleng rel a rawn lut thei ta hi Mizoram tan chuan hmasawnna rahbi pawimawh leh liantham (historic milestone) tia sawi tham chu a ni awm e. Chutih rualin, a lo dawnsawn dan kan thiam loh erawh chuan thatpui aia chhiatpui theih a ni tih erawh kan hriat reng a pawimawh dawn hle.
A ram leilung lo luah sa tawhte hi mikhual lo lut thar ten an duhthalin min rawn chim hum hum thei lo tih kan hre vek tawh. A leilung luahtute zawk hi kan dik loh a, Mizo hnam hming hawhtir duhna thinlung nena hnam dangte lo welcome kan tum erawh chuan, ILP pawm tun chungin kan bet rawk rawk mai dawn a ni.
Chuvangin, sumdawnna thilah a ni emaw, mihring thilah a ni emaw, chimrala kan awm lohna tura pawimawh ber chu ‘|anrualna’ bawk hi a ni.