Rel kawng sial compensation la dawng loten chet lak inpeih reng

Sairang thlenga rel kawng sialnaa an ram laksak zinga compensation la dawng ve lote chuan an beisei anga thil a kal lo a nih chuan chet lak tumin an la inkau reng nia sawi a ni.
The Aizawl Post-in a zawhchiannaah compensation la dawng lote hian August 19 atanga 22 chhung khan spot verification titharin competent authority for land acquisition (CALA) aiawh chu Aizawl district bawrhsap pisa atangin a hmunah an kal a, tun thlenga compensation la dawng lo mi 14-te harsatna tawh dan hi a hmunah enpuiin, a tul angin ram teh that a ni a, teh that tul tih loh pawh an nei tih thu dawn a ni.
An teh thatte pawh hi an buaina sa chinfel sak zawnga enfel a ni lem lo niin an ngai tih thudawnna chuan sawiin, a then phei chu an enawn sak lo hrim hrim a; vawiin – August 25 hian verification neih dan ngaihven hian bawrhsap pisa an dawr anga, an beisei anga hma lak a ni lo nia an hriat chuan compensation hmu tura an kal zel dan tur hi ngaihtuah ve leh an la tum tih thudawnna chuan a sawi.
Tarlan tawh angin compensation la dawng lo 14 leh la pek kim loh mi pakhat an awm a. Compensation an dawn tur chhut chhuah sak tawh hi a vaia belhkhawmin Rs. 14,56, 29,759 a ni. Compensation an la dawn loh chhanah hian CALA leh Railways hi an inpuh tawh niin an sawi a, kumin August thla chhunga pek an nih loh chuan an ram chin hi na taka hauha humhalh an tum tih an lo sawi tawh a ni.
Bairabi atanga Sairang thleng rel kawng sial hi siam zawh a ni tawh a, enchhin vek tawh niin, Serptember 13 hian Prime minister hawn tir tum a ni.