Rel kawngka kharna dah vek dawn
Rel kawngka kharna dah vek dawn
Mumbra, Maharashtra-a Thawhtanni tuka rela tawhsuala mi pali thi leh mi pakuain hliam an tawrhna thlen hnuah railways chuan khawpui lian a dai vela tlan thin relte chu amaha a kawngka inkhar thei tura November-a siam danglam vek turin a ti a, January atang chuan chutiang chauh tlan tawh turin a ti.
Thawhtanni tuka chetsualna thlengah hian rel tawt taka a rahkaa chuang mi 13 zing mite chu anmahni tawk zawnga tlanin an hnunga ip an ah a sut avanga tlain GRP constable telin mi pali an thi a, pakuain hliam an tuar a ni.
Railway Minister Ashwini Vaishnaw leh Railway Board-a tel hotu lawkte chu Chennai-a Integral Coach Factory (ICF) team nen hmanhmawh taka thutkhawm nghalin hetiang hi a thlen tawh lohna turin ruahmanna an siam nghal a. Mumbai-a AC hmang lo tual chhung relah automatic door closing system dah vek turin an ti a ni.
Ruahmannaah hian non-AC suburban coach-te chu a thara duan a ni ang a, boruak chhuahna tur siam vek a ni dawn bawk tih Central Railway (CR) hotu lianin a sawi.
“Coach tharah chuan kawngka khar a nih pawhin pawn boruak a luh theihna tur siam a ni dawn a. A chungah boruak luhna tur roof-mounted ventilation unit dah a ni ang a. Coach tin inkarah a chuangte chet velna a awlsam nan awl siam a ni zel tawh bawk ang,” a ti.
Heng rel pindan tharte hi Mumbai Urban Transport Project (MUTP) hnuaia tual chhunga air-conditioned (AC) rel 238 siam tawh sa belhchhahna tur a ni bawk tih a sawi.
Tun hmaa an buaina ber chu non-AC coach-ah hian kawngka khar a nih chuan boruak luh leh chhuahna a awm tha lo thin a, hei hi himna atan leh a chuangte tan hrehawm a ni thei tih tih a sawi bawk.
Kum 10 vel liam tawhah khan automatic door closure system hi Western Railway hnuaia tual chhung relah enchhin a lo ni tawh a, a chuangte zingah boruak duh ang tawk thawk tur awm lo avangin sawisel a ni tih pawh an hriat thu a sawi.
Tunah hian CR hian khawpui leh a chhehvela tlan rel 157 a nei mek a, heng zinga pasarih hi AC a ni a. Western Railway hian khawpui leh a chhehvela tlan rel 95 neiin pariat chu AC an ni.