Rela rawn lut ILP 4000 pe tawh Sawrkar leh MZP sawi dan ianglo
Mizoram Police chhinchhiah danin, Sairang Rel Station hawn a nih atanga tunkar Nilaini thleng khan rel hmanga Mizorama rawn lut inner line permit neih ngai hnamdang mi 4000 chuang hnenah ILP pek a ni tawh. Mizo Zirlai Pawl chuan rel-a rawn lut zat hnamdang ngaihtuahin ILP pek chhuah heti zat chauh a ni chu mak a tih thu sawiin, ILP nei loa putru an tam thei dawn tih a sawi. Mizorama rel lo lutin nghawng hrang hrang a neih dan thlirhoin Ningani khan Home minister K Sapdanga hoin sawrkar hotute an thukhawm a. Heta report a nih danin, Aizawl district bikah rel station hawn tirh, kumin September 13 atangin October 8 thleng khan ILP 4064 pek chhuah a ni tawh. Kutdawh pali leh ILP nei loa Mizoram lo lut mi pali man chhuah an ni a, heng mite hi thawn let an ni. Sairang Zero Point-ah a khat tawkin ILP surprise checking neih thin a ni bawk.
Kolasib district huamchin lamah ILP pekchhuah buaipui tur hian Bairabi-ah mi 8, Hortoki-ah mi 2, Kawnpui-ah mi 2 leh Mualkhang-ah mi 2 duty dah an ni a. Kolasib-a rel station-ah bik ILP 38 pek chhuah a ni tawh. Sairang thlenga rel service a awm hnu atangin Vairengte-a ILP pek chhuah leh inter-state maxi cab service chu zaa 30-40 velin a tlahniam nia hriat a ni.
Hetihlai hian MZP Gen. Hqrs. hruaituten Ningania thuthar thehdarhtute an kawmnaa kutdawh lut zat an neih leh ILP nei lo man an neih hi Mizoram Police record neih nen a inang lo.
MZP hian rel station hawn a nih tuk, September 14 atanga October 7 thleng record a nei a, hemi ang hian Sairang Rel Station atanga ILP pekchhuah tawh hi 3852 a ni. Kutdawh thawn kir 6 an awm tawh a, ni khat chhunga ILP pek chhuah tam ber tumin mi 360 pek a ni a, a tlem ber tumin mi 46 hnenah pek a ni. October 8-a a hmuna Sairang Rel Station an tlawh tumin, ILP neilo, a ruka chhuah tum mi 30 vel an man chhuak tih an sawi a ni.
Guwahati atangin Sairang thlenga kal tur rel ticket a full reng lai a, ILP pekchhuah tlem lutuk chu MZP chuan mak a ti hle tih an sawi a. Hei hian ILP neiloa bibo tam tak an awm tih a lantir tih an sawi.
Hei bakah hian Bairabi leh Sairang inkara station – Hortoki, Kawnpui leh Mualkhang lamah pawh rel a tlan muang deuh nia sawi a awm tih MZP hruaitute hian sawiin, tam tak an chhuk nia hriat a nih thu leh, an zirchian mek lai hian, heng hmunah hian police duty awm ve mah se, tam tak chu ILP neiloa an chhuah ang ring tih an sawi a ni.
“Mizoram-a hnamdang lo lutte hi tourist ang veka ILP pek an ni a, an lut lam chhinchhiah ni mah se, an haw lam chiang taka chhinchhiah a ni loa, hei hian Mizoram-ah awlsam taka luhna atan mi tam takin an hmang dawn tih a chiang a, chamhlen ta pawh tam tak an awm dawn tih a chiang a ni,” MZP president Dr C Lalremruata chuan a ti.
Hnawhsarum takin India sawrkar hian he station hi a hawng ringawt mai a, station a nihna tur ang la nilo tih hrereng chungin Prime minister hawn tir a nih bakah Mizoram sawrkar la inpeih loh zia pawh chiang takin a hmuh theih tih MZP chuan a sawi a ni.