Relah hralh nia sawi naupang 163 chhanchhuak

Madhya Pradesh-a Katni district-a express train-ah Bihar atanga Maharashtra-a hralh nia sawi mipa naupang kumtlinglo 163 vel chu rel police-ten an chhanchhuak tih thuneitute chuan Pathianni khan an sawi.
Naupangte hi kum ruk leh kum 13 inkar an ni a, Bihar atanga Latur-a inhlawh thawk tura phurh an nih laiin Inrinni zan khan RPF leh GRP chuan Child Welfare Committee-in thu an dawn vangin an lo dang niin an sawi.
Zankhuaa an beih hnuah Railway Protection Force (RPF) leh Government Railway Police (GRP) te hian mi pariat an man a, Katni rel station-ah hian Patna-Purna Express-a ticket leh lehkha pawimawh nei mumal lovin naupangte nen an zinho tih an sawi.
An chhui tawh china a lan danah chuan naupangte hi Bihar-a Araria atangin Maharashtra-a Latur-ah hruai an ni tih RPF Katni Inspector Virendra Singh-a chuan PTI a hrilh.
Police hian naupang hralh chungchangah hian thu an dawng a, zinna atana pawimawh lehkha dik an hmuh loh avangin an ringhlel a, hei vang hian beihpui an thlak zui ta a, Pathianni tuk khan an zo fel tih a sawi.
Singh-a chuan GRP-te chuan Bharatiya Nyaya Sanhita (BNS) section 143(4) (naupang kum 18 hnuai lam hralhna) hnuaiah thubuai an ziah luh thu sawiin thubuai siamsak mi pariatte hi Bihar-a district hrang hranga mite an nih thu a sawi.
Mipa naupang an chhanchhuahte hi Latur-ah inhlawh tura hruai an nih thu a sawi a, GRP chuan hei hi an chhui zui mek tih a sawi bawk.
Thuneitute hian CWC-in thil rinhlelhawm tak hnuaia naupang tam tak phurh chungchangah thu hi an dawng a. Venhim hna thawktute hian rel hi platform number 5-ah an nghak a, a thlen veleh pindante an dap zui nghal a, naupangte hi him taka hruai chhuah niin an sawi.
Child Protection Officer Manish Tiwari-a chuan thuneitute hian thu an dawn veleh hma an la nghal tih a sawi a, naupang chhanchhuahte hi an kawm chianga a, counselling pawh an pek zui mek thu a sawi.
Thuneituten an kum, an nihna leh an zin chhan an finfiah laiin an nu leh pate biak tumin hma an la tan tih a sawi bawk.
Naupang thenkhat chu Katni-ah dah an ni a, thenkhat chu Jabalpur-ah naupang awmna tur hmun siamah dah an ni rih bawk.