Remna chu a tlo; Ralmuanna ve thung?

Last updated Jul 1, 2025 6 0
Nimin June 30, 2025 khan, Remna Ni champha (vawi 39-na) chu hman liam a lo ni leh ta a.
Remna Ni pual hian Zoram Research Foundation, NEICC Peace Centre, Shillong leh Aijal Club-te chuan India hmarchhak state hrang hranga rambuai dan leh remna a thlen dan zirhona ‘national seminar’ an huaihawt a. India hmarchhak state zinga Mizoram Peace Accord tlo bik nachhante pawh sawiho a ni bawk.
Remna Ni champha 39-na hial kan hman theihna chhan chu sawifiah ngai lovin kan hre vek a; ‘remna tichhe zawnga chetlakna a awm zui tawh loh vang’ a ni ber mai.
India leh Mizoram inkarah chuan innghirnghona awm zui tawh lovin ‘Remna’ chu a awm zui zel a ni thei a, Peace Accord tlo bikna chhan han zir chian te pawh chu a tha e; mahse, Remna a tlo em em lai hian, Ralmuanna lam ve thung hi, eng dinhmunah chiah nge kan din tih hi kan zirchian ve a ngai ta niin a lang.
State dang atanga Mizoram tlawha lo zin thin khualzinmi (tourist) thenkhat chuan Mizoram an hmuh dan an sawi zingah ‘khawlai a ralmuang’ tih hi an telh chawk a, an khaikhin state dangte ai chuan a ralmuang zawk an ti te pawh a ni ang a, a tha vek e. Kan khawlai hi ‘a ralmuang lo’ tia han sawi tur chu a ni lo ang. 
‘Remna’ lam ringawt emaw, ‘a tlo chhan’ lam ringawt emaw, a ‘ralmuanna’ lam ringawt emaw kan thlir chuan ‘a ralmuan lohna’ lam hi kan hmu tha thei dawn lo tihna a ni a; chuvangin, a ralmuan lohna lam hi kan thlir tel ve fo a pawimawh dawn a ni. 
Pakhatnaah chuan, hriselna lamah: Cancer tamna, HIV/AIDS hluarna, Ruihhlo chi hrang hrang hluarna leh ruihhlo ngai tamna; vaihlo leh a kaihhnawih hluarna.
Pahnihnaah chuan, mihring kan pung chak lo va, a chunga natna hrang hrang tarlante avang khian mihring kan ral chak ve leh zel si.
Pathumnaah chuan, kum tin lehkhathiam thalai rual an pun belh reng a, hnathawh tur nei lo thalai an tam tial tial bawk. 
Ei leh bar thawhchhuah kawngah, intodelh lam kan la hnaih lova, sik leh sa leh environment lam, a chhe tual tual a, tuihna a kang zel bawk a. Heng zawng zawng han ngaihtuah hi chuan, kan state hi a ralmuang lo ru riau a ni.