Remna kan neih hi Zoram mipui inchhuanna tur a ni – Larsap

Mizoramin remna tha tak a nei bik chu a chhunga cheng mipui tan inchhuanna tur a ni tih larsap Dr Hari Babu Kambhampati chuan a sawi a. A vawngnungtu ni zel turin mipui a sawm.
Independence Day vawi 78-na puala thuchah a siamah larsap chuan, ram tana zalenna sualtute inpekna kha kan thinlungah a thar a ni, tiin, ram puma khua leh tuite rualin a ni pawhin ram pasalthate kha zah takin chibai a buk tih a sawi.
Prime minister Narendra Modi chuan kum 2047-a Viksit Bharat (Developed India) nih kan tum thu a puang tih sawiin, “Viksit Bharat neih theih nan Viksit Mizoram nih tum hmasak a ngai. Hemi kawngah hian Mizoram mipui zawng zawng ram changkang nih kan tumna tihhlawhtlin nan theihtawp chhuah turin ka sawm a ni,” a ti.
Mizoram larsap hna kum thum a thawk ve ta chu a lawm hle a. Hemi hun chhung hian state leh ram hmasawnna kawngah a phak tawkin theihtawp a chhuah ve a. Hemi hun chhung hian kawng hrang hrangah Mizoramin hlawhtlinna lian zawk kan thawk chhuak thei tih a hmu chiang tawk tih Dr Hari Babu Kambhampati hian a sawi.
Sum lama harsatna tawk state kan nih avangin resource mobilization kalpui a awlai lem loa, hetiang hi kan dinhmun a nih avangin mipui vantlangin sawrkar laipui hnuaiah social security scheme tam tak a awm tih kan hriat a ngai tih a sawi a. Heng scheme hrang hrang hi a kaihhnawih thuneitute, bank leh official dangte hnen atanga zawtfiah turin mipui a chah.
State tan hmasawnna ruhrel liantham zawk din ti harsa em em tu pakhat, inkalpawhna kawngpui tha tawk lo chu, rel kawngin state hmelhmang a la rawn thlak danglam dawn tih larsap hian a sawi a. Chutih rualin sawrkar laipui atanga sum tam tak kawngpui siamna atan kan dawng chung a, kawng siam hna tam zawk kan zo hleithei lo chu pawi a tih thu a sawi.
“Kan dam khawchhuahna kawngpui kan tih mai, Vairengte- Sairang National highway 4-lane siam tur a la tangkhang ngat phei hi chu a pawi zual a, kan chhut thiam phak bakin min ti thuanawp mek. Kawngpui tha neih hmasak hi hmasawnna ruhrel lian dang din tura thil pawimawh hmasa ber a ni tih hre tlang ang u,” a ti.
Hmasawnna sawi lai mekin, remna hlutzia hriat fo a ngai tih larsap hian sawiin, “Kan state thenawm ram pahnih hian tunah politics lamah buaina nasa tak an tawk a. Tharum thawhna tuipuiin min hual vel mah se, remna thliarkar ang maiin kan awm reng a. Hei hi Mizoram mipui kan inchhuanna tur niin ka ngai. Remna hlu tak kan nei hi kan vannei bik a, a vawngnungtu ni turin ka ngen a ni,” a ti.