Remna Ni pual Cycling Race

Mizoram Cycling Asso-ciation (MiCA) chuan Remna Ni (June 30, 2023) hian Muthi ramah a duh apiang tel theih turin Cycling Race a buatsaih dawn a; he race-ah hian kawng bumboh leh chhuk chho tak tak tlan a ni dawn a, a race kalphung hi Cross-Country Olympic (XCO) a ni ang.
He intlansiakah hian category pathum a awm dawn a, Junior – kum 17 chin a ni ang a, Master – kum 35 chung lam niin, Elite-ah erawh a duh apiang an tel thei ang a, category pakhatah chauh tel theih a ni ang. Elite huanga pakhatnain Rs. 15,000; pahnihnain Rs. 10,000; pathumnain Rs. 5,000 an dawng ang.
Junior leh Master-a pakhatnain Rs. 10,000; pahnihnain Rs. 6,000; pathumnain Rs. 4,000 an dawng ang a, category tina pakhatna atanga pathumna hian medal leh certificate an dawng theuh dawn a ni. Category tina palina leh pangana-te’n Rs. 1,000 leh certifi-cate an dawng ang a; he intihsiaka tel zawng zawngin ‘Participation Certificate’ an dawng ang.
‘Mizoram XCO 2023’ hi MiCA-in XCO race a buat-saih tum khatna tur a nih avangin rider-te zingah pawh hetiang kawng hlauh-awm leh chhuk chhoa tlan nuam ti chite an phur tawh hle a, Mizoram chhung mai ni lo, ram pawn atang pawhin rider lo tel tura sawm an ni bawk. Thirsa-kawr eng chi pawh, electric hmang tih loh he intihsiaknaah hian hman theih a ni ang.
Registration hi June ni 15, 2023 (11:59pm) thlenga tite tan Rs. 300 a ni ang a, a hnu lama ti duhte tan June ni 27, 2023 (11:59pm) thleng tih theih a ni ang a, fee erawh Rs. 600 a ni thung ang.
Registration leh fee-te hi online hmanga pek theih a ni a, manual-a form submit duh tan pawh Cycle Shop, Bawngkawn leh Js’ Hub, Mission Vengah tih theih a ni ang. Online form submit-na: chu https://forms.gle/xHV8hzmDwC2svW8S7 a
MiCA hi December 1, 2015-a din niin, Mizoram Societies Registration Act hnuaiah kum 2021 khan a in-register. MiCA hi Mizoram State Sports Council hnuai member association 33-na ni turin May ni 9, 2022 khan lakluh a ni. An hnuaiah hian Ko-lasib, Lunglei leh Cham-phai District Cycling Asso-ciation an awm mek a ni.
MiCA hi pawl la nau-pang tak ni mah se Mizo-rama cycling sport-in hma a sawnna turin hma nasa takin a la a; race hrang hrang buatsaih thinin, Tour de Hmuifang hi kum-tin Tourism Department nen tangkawpin an buatsaih thin. Sports minister Robert Romawia Royte hmalaknain kumin 2023-ah pawh hian Tour de Hmuifang hi huaihawt leh ngei an tum a ni.
Cycling hi sports disci-pline tha tak a nih hre rengin department hrang hrangte pawhin an prog-ramme leh project mipui-te hriata phochhuahna’n leh hmasawnna atan MiCA-te nen hian rally engemawzat an buatsaih tawh a ni.
MiCA hian race leh rally buatsaih mai ni loin kawngpui dunga cycle khalhte tana fimkhurna tur leh midangte tana har-satna awm lo zawnga khalh thin tur te, traffic rules leh traffic police-te thu zawm turtein cyclist-te zirtirnate pein, kalphung mumal takin hma an la chho mek zel a ni.