Remna Ni pualin essay inziahsiak

Remna Ni 2023 lawmna chi khat atan district tinah Thawhlehni khan higher secondary school zirlaite tan essay inziahsiak buatsaih a ni a, thupuiah “Political History of Mizoram: 1947 (post independence) to 1987 (statehood i.e 20th February 1987)” tih a ni.
Essay inziahsiak hi district khawpui tinah Education office/ DPC Samagra Shiksha kaihhruaiin neih a ni a. District level leh state level-a inelna tur niin, district level-a a titha thlanchhuahte hi state level intihsiakna atan Samagra Shiksha office-ah thehluh a ni anga, district tin atanga a titha thlante essay ziah atang hian state level-a lawmman dawng tur thlan leh an ni ang.
District level competition-ah hian pakhatna Rs 30000, pahnihna Rs 20000, pathumna Rs 10000 bakah certificate pek an ni anga, state level-ah pawh hetiang zat tho sumfai pakhatna atanga pathumna lawmman dawngtute hnenah pek an ni ang.
District level essay competition-ah hian district tin atanga report dawn belhkhawmah higher secondary school 79 an tel thei a, heng school atang hian zirlai 274 an tel a ni.
Vawiin – June 21 hian Remna Ni pual vek hian district tinah quiz intihsiak neih a ni leh dawn a, State level competition chu June 27-a neih tur a ni. Quiz leh essay inziahsiak lawmman dawngte hi June 30 – Remna Ni lawmnaah sem tur a ni.
Serchhip district-ah chuan Thawhlehni vek khan Serchhip district Superintendent of Police leh Education department tangdun chuan high school leh higher secondary school zirlaite pualin ruihhlo dona hmalakna pakhat atan essay inziahsiak, “Ruihhlo Thalaite hmelma” tih thupui hmanga neih a ni bawk a. He intihsiaka tithate hnenah hnenah hian Remna Ni lawmnaah lawmman sem a ni ang.
Lungleiah chuan essay inziahsiakah hian school 8 atangin zirlai 35 te an intihsiak a. Kolasibah chuan district bawrhsap John LT Sanga’n a hmanpui a. Remna chu hlut thiam a pawimawh thu sawiin, remna a awm zel theihna’na mi tangkai nih tum turin zirlaite a chah. Kolasiba higher secondary school zirlai 15 an tel a; high school leh middle school tan lemziak intihsiak nei bawkin, zirlai 30 an tel.