Congress-in sawrkar tha siam kan tlin – Lalsawta

Ram enkawl tha turin sawrkar tha a pawimawh a, chumi siam tur chuan an party chuan an ti thei a, an tlin tih Congress president Lalsawta chuan a sawi.
MPCC-in Thawhlehnia Aizawla party mi intuaitharna an hmanah an president chuan ram enkawl chungchangah sawrkar tha a pawimawh, sawrkar tha siam turin an thei a, an tlin tih a sawi.
Election Commission of India-in inthlanah MLA candidate-te sum hman tur a ruahman bakah kohhranin sum seng lo turin political party-te ngenin inthlan thianghlim leh tha nei turin a vil zui dawn bawk tih a sawi. Sum seng tamten sawrkar huna mipui sum an lak then leh tur ang niloin, an ni chuan sum niloin Pathian lam an hawi a, an sawrkar leh sawrkar loh chu Pathian thu thu a ni tih Congress president hian a sawi. “Party thenkhat chu inthlan behbawmah an lung timuangtu chu sum a ni a. Keini chuan sum kan nei lo, candidate-te mi hausa ni lo mahse mi tha, mi dik leh rintlak an ni dawn,” a ti.
Ram siamtha turin kan tihphung pangngai ang chuan a danglam dawn loa, tih danglam a ngai tih sawiin, “Ram tan danglamna siam turin kan lokal a ni,” a ti.
Congress party zawm thar zing ami Mizoram chief secretary hlui leh chief information commissioner hlui Lalnunmawia Chuaungo chuan state danga hun rei tak hna thawka a awm tawh thu leh state dang thil tih tha Mizorama tih theih awm vea a hriat thu a sawi a. Thil zawng zawng chu tih theih loh mah se, thil tha engemawzat chu Mizoram tan a tih ve theih dawn nia a hriat avangin politics-ah a zuanglut tih a sawi. Eng party ah pawh awm ila, chief minister tur chu tunge tih thlira zirchian a ngai tih sawiin, CM ngaihdana ram hi kal tur a nih avangin an pawimawh hle tih a sawi. “Mizorama ka lo chhuah hnua ka thil hmuhchhuah chu, Gujarat aiin Mizoramah officer fel leh taima an tam zawk. Pu Lalsawta hoa sawrkarna kan siam hunah officer fel leh tha tam zia kan hmu dawn a ni,” tiin IAS a nih laia Gujarat sawrkar hnuaia principa secretary thlenga thawk tawh Lalnunmawia Chuaungo hian a sawi.