Renewable energy lama thawh dun theih dan dap

Renewable energy lama hma latu SELCO Foundation (SF) chuan Social Welfare & Tribal Affairs department nena thawhdun theih dan tur dapin Ningani khan Aizawlah an thukhawm.
SELCO Foundation (SF) state lead Lalnuntluanga Colney chuan state chhunga eizawnna tihchangtlunna leh sik leh sa inthlak danglam tih ziaawm kawngah environment tichhe lo zawng leh a ngelnghet zawnga khawl tha chakna hman theih dan kawng zawn a pawimawh dan a sawi.
Social Welfare & Tribal Affairs director Dr Lalhriatzuali Ralte chuan department schemes, policies leh programmes awm tawhte nena DRE (Decentralized Renewable Energy) solutions hmanga eizawnna tihchangtlun theih dan tur a sawi a. An department hnuaiah rualbanlo leh hmeichhe chanhai leh rahbi tleute tan puanthui zirna a awm tih sawiin, nizung chakna hmang puanthui khawl hman tura hma lak kawngah leh training centre tihchangtlun kawngah SELCO nen thawh dun theih a beisei tih a sawi.
An department hnuai ami tho Tribal Research Institute (TRI) Kelsih chu a hman theih tep tawh a, helai hmunah pawh hian nizung chakna hmang power an mamawh dawn tih a sawi bawk. Sawrkarin hand-holding policy hnuaiah hmachhawp hrang hrang an nei tih sawiin, Phunchawng leh Rangvamual bawra ‘Mission Chhanchhuahna’ bul tan tawh chu chhunzawm a, ruihhlo ngaite, jail tang chhuakte tana thiamthil pek dan tur an duan mek bakah ‘Smart Tribal Village’ – thingtlang tihchangtlun dan tur an duan mekah hian SELCO Foundation nen thawh dun theih a beisei tih a sawi a ni.
Thutkhawmah hian sumdawnna lama DRE Solution (solar sewing machine) hmang tawh hnen atangin a experience ngaihthlak a ni a. Power supply a awm loh chang pawhin harsatna awm loin hna a thawk thei tawh dan a sawi a ni.
SELCO Foundation hian kum 2023 January khan Mizoramah bul tanin hmathlir lian tak a neih zingah, Mizorama eizawnna lama harsatna awmte sutkian nan renewable energy (solar) hmangin livelihood sector hrang hrang – lo neih, ran vulh leh sumdawnna tenau tih hmasawn a ni. SELCO Foundation hian Mizoram district zawng zawngah hma a la mek a ni.