Republic Day lawm-naah MJA tel lo

India-in a puala ram danpui a hman tan ni champha, Republic Day 2026 chu India ram hmun dang rualin Mizoramah pawh Thawhtanni khan hman a ni. Aizawla lawmnaah erawh journalist/ accredited journalist-te chunga sawrkar hotute thil kalpui dana lungawiloh avangin an tel lo.
District headquarters tinah Republic Day hi an bawrhsap theuh nen hman a ni a. Zing lama hman niin, dan pangngaiin khuallian-ten ram puanzar an pawhpharh hnu ah parade contingent-ah puanzar chibai an bukna an chhanglet a. An district chhunga sawrkar hmalakna langsar puanna hun atan an hmang bawk.
Hetihlai hian Aizawla hmanna turah journalist, a bikin sawrkarin ‘accreditation’ a pekte laka zahpah lohna awm nia hria in Mizoram Journalists’ Association chuan Republic Day lawmna leh a hnua Governor at Home atangin an inhnukdawk.
Thawhtanni la la khan MJA Gen. Hqrs. Executive Committee chuan extended emergency meeting nei nghalin, thuchhuah an siam a. India ram ni pawimawh Republic Day leh Independence Day-ah sawrkar thuneituten press mite pawimawhna hria in, duhsak takin kum tam tak chhung press mite tan thutna bik ‘Press Enclosure /Gallery’ a siamsak thin chu an lawm thu an sawi rualin, kumina Lammuala Republic Day lawmnaah ‘Press Enclosure /Gallery’ siam a ni lo tih Aizawl DC office-a officer-te hnen atangin hriat a nih bakah a hmunah finfiah a ni bawk tih thuchhuah hian a sawi.
‘Republic Day ngai pawimawha press mi kalte’n thutna remchang tha kan nei ta lo a. Republic Day lawm dan tur relnaah MJA aiawh kan tel a, kan duh dan leh kum hmasa lama harsatna kan lo tawhte chiang taka sawi chhuah a ni chung a, Press Enclosure /Gallery siam a ni lo hi a pawi kan ti hle,’ a ti.
Hetiang hi thil awm dan a nih avangin Republic Day lawmnaa tel tuma Lammuala kal press mite chu an haw leh a. Hetianga kal a ngai ta hi a pawi an ti takzet tih a sawi a ni.
Kumin Republic Day lawmna leh Governor’s At Home-a tel tura sawmna inpek danah pawh thil fel lo, thil nih dan phung ni lo a awm nual tih sawiin, hei pawh hi a zialo an ti hle tih a sawi a ni.
‘Heng harsatna hrang hrang hi tun hnuah chuan thleng tawh lo se MJA chuan a duh tak zet a; national day – Republic Day leh Independence Day lawmna reng rengah Press Enclosure /Gallery siam zel turin sawrkara mawhphurtute kan ngen a ni,’ a ti.
Hemi chungchanga MJA hruaitute atanga thudawn danin, kum kha leh chen lo kalpui tawh, tunhnai kum 4/5 vel kalta atanga national day-a press mite tana ruahman bik awm thin leh thildangah namnul an ni fo chu tunah a puakchhuak ta a ni ber tih sawi a ni.