May 23, Zirtawpni khan LBS Suzuki 22nd CYMA Football 2025 khelh chhunzawm a ni a, champion tura rinkai zinga mi Republic Veng chuan hma lam pan zelin quarter-final an lut. Inkhel dangah Kawnpui Vengthar leh Bethlehem Vengthlang ten hnehna changin quarter-final an lut ve bawk.
Inelna neih mekah chetha tluang a, champion tura rinkai ber pawl ni tawh leh he inelnaa champion tawh awmchhun ni mek Republic hian RG Stadium-ah team tha tak Khawzawl Vengthar an hmachhawn a, inkhel hmuhnawm takah 1-0 in hnehna an chang. Republic leh Khawzawl Vengthar te hi an inhnehtawk viau a, chawlhlawk hmain goal thun thei an awm lo.
Inkhel hmuhnawm takah chawlhlawk hmain goal lut awm thei lo mah se chawlhlawk hnu lamah goal a lut ta thuai thung. Minute 51-na lekah veteran player F Lalrinpuia chuan Republic hmahruaina goal a thun. Khawzawl Vengthar in an si phurh sut tum viau mah se an vanneih ni a ni lova, hun pumin goal an thun thei lova, Aizawl team tha Republic lakah uiawm taka tlawmin quarter-final an lut zo lo. Champion tura rinkai Republic hian F Lalrinpuia goal thun hmangin hnehna an chang a, quarter-final lutin hma lam an pan zel a, final an hnaih leh zual sawt.
Zirtawpnia inkhel dangah inelna neih meka khel tha tluang tak Kawnpui Vengthar chuann Aizawl chhuahlam veng a mi College Veng an hmachhawn a, si hnih faia hnehna changin quarter-final an inhlangkai ve bawk.
Kawnpui Vengthar hian College Veng lakah bul an tan tha viau a, inkhel tan atanga minute kuana 9-na lekah Lalrinhlua chuan hmahruaina goal a thun. Hma taka goal an thun hian inrintawkna sang zawk a pe a, RG Stadium-ah phur takin an inlan. College Vengin an si phurh sut tumin tan khawh nasa via mah se phur taka inlan Kawnpui Vengthar an paltlang hleithei lo. 1-0 a hmahruai mektu Kawnpui Vengthar tan hian H Lalbiakthanga chuan goal thun belh lehin an chakna a nem nghet a, College Veng hnehin quarter-final an inhlangkai zui ta a ni.
Republic leh Kawnpui Vengthar ten quarter-final an luh hnu hian Bethehem derby khelh chhunzawm a ni a. Inkhel ngaihven hlawh takah Bethlehem Vengthlang chuan 6-1 ngawtin hnehna an chang a, Bethlehem derby-ah hnehna lian changin quarter-final an inhlangkai.
Bethlehem Vengthlang hian Bethlehem Veng lakah duhthusama thain bul an tan a, inkhel tan atanga minute hnihna lekah Lalrammawia chuan hmahruaina goal a thun nghal. Hmahruaina goal thuntu Rammawia hian goal khat a thun belh leh bakah K Lalramzauva chuan goal hnih a thun a, K Lalmalsawma leh Lalruatkima ten goal khat ve ve an thun belh bawk. Bethlehem tan hian Zomuanthanga chuan minute 67-naah zangnadawmna goal a thun.
Republic in hma lam an pan zel
Get real time updates directly on you device, subscribe now.