Republic Vengin chawimawi

YMA Republic Veng Branch chuan an veng chhung mi, an member, tunhnaia state huapa titha te leh veng tihmingthatute chu an chawimawi.
Nilaini zan khan YMA Republic Veng Branch YMA hian YMA Kumpuan “Ram leh hnam humhalh” an hawng a. Central YMA vice president Prof. Lalnuntluanga’n a hawng. In hmun lo ram hralh leh lei chungchangah Mizoram chhungah hnamdangten chanvo an nei loa, sumdawnna chungchangah pawh tribal ni lo tan phalna a neih theih loh a. Chutihlaiin tunah chuan, a taka neitu hnamdang ni si, Mizo sumdawng kan thahnem ta hle tih sawini, “In hmun hralh chungchangah pawh a leitu Mizo ni si, a taka neitu hnamdang ni ta a thahnem hle a. Hetianga hnamdang kawppui thintute hi hnam phatsan tu an ni,” a ti.
Republic Veng YMA hian an veng chhunga chawimawi phu an chawimawi nghal a. MPSC Combined Competitive Exam 2023-a MCS topper Lalnunpuia Renthlei, Book of the year 2023 ziaktu K Vanlalhmangaihi, Miss Mizoram 2024 Jennifer Lalrinzuali Renthlei, doctorate degree hmu thar Dr Lalhriatpuii leh 29 MIMSA Racing champion Lalramdina te an ni.