Rev Graham visa pek duh loh pawi tih thu PM hnenah thlen

Nagaland-a rawngbawl tura sawm Rev Franklin Graham chu India sawrkarin visa a pe duh lo a. Congress president Lal Thanzara chuan Prime minister hnenah Kristiante leh India danpui tihnghinna a ni, tiin lehkha a thawn.
Kum 53 kaltaa Rev Dr Billy Graham-a’n Nagaland-a crusade a neih hriatrengna atan Kohima Baptist Pastors Fellowship bultumin Nagaland Baptist Church Council leh Nagaland Joint Christian Forum chuan kumin November 30 ‘Love, Peace and Unity’ message pe turin Billy Graham fapa Rev. Dr. Franklin Graham an sawm a, India sawrkar hian visa a pe thei lo tih sawi a ni.
MPCC president hian he thil hi hrilhhaithlak a tih thu Prime minister hnenah hian ziakin a thlen a. India chuan Constitution-a inphum sakhaw zalenna leh intluktlanna a chhuang thin em em a; chu zalenna leh intluktlanna chu khawvel huap pawha Pathian thusawitu lar Rev Franklin Graham visa pek phalloh chuan a tinghing takzet, tiin, India-a Kristian-te mai ni lo, danpui bulthut tihnghinna a ni, a ti.
Hun lo la kalzel turah sakhuana behchhana thleibikna kalpui thin titawp turin a ngen bawk.