Reliance Foundation Development League Zonal Stage North East Group-ah Mizoram Youth Football Foundation (MYFF) chuan nimin khan sithum faiin Aizawl FC an hneh.
1st Bn MAP Ground, Armed Venga inkhelah hian MYFF tan Lalramtluanga, Jonathan Lallianchawi leh J. Lalbiaklianate’n goal an khung. Team pahnih pahnih hi January 30 hian RYFF home-ah an in khel ve leh ang.
MYFF hi hi football ngaina mi panga – Vanlalhruaia, Lalliansanga (Tatea), C. Vanlalrindika, Jeho MS Dawngliana leh P. Moiate din a ni.
RFDL North East group-ah hian team paruk an awm a, Mizo club pahnih MYFF leh Aizawl FC bakah Classic FA, NorthEast United, Shillong Lajong leh Jamshedpur-te an awm.
Team pahnih hi vawihnih theuh (home & away)-in an inkhel chhuak vek ang a, a sang pahnihin national championship an khel ang.
Inelna hi February ni 6, Ninganiah an chhunzawm dawn a, chhun dar 11:30-ah MYFF hian NorthEast United an hmachhawn ang a, tlai dar 2:30-ah Aizawl FC leh Shillong Lajong an intum dawn a ni.
Round 2 hi Jowai, Meghalaya lama khelh tur a ni thung.
MYFF hi Mizoram region champion niin, table-ah hma hruaiin, Aizawl FC-in dawtin, anni pahnih hi Mizoram region atanga qualify-te an ni.
RFDL North East inkhel hmasaberah MYFF chak
Get real time updates directly on you device, subscribe now.
Next Post