Ril cancer lan chhuah dan
Ril cancer lan chhuah dan
Rajiv Gandhi Cancer Institute & Research Centre-in a tarlan danin ril (colorectal) cancer hi India-a cancer tam ber parukna a ni.
Colon/colorectal cancer hi kum upa lamah a tam zual a, ei leh in lama fimkhur loh vang leh stress vangin hetiang cancer hi a awm duh niin an sawi a, hetiang cancer risk tisang thei dang te chu- colitis emaw Crohn’s disease lo nei tawh te, thisen zawmpui zingah hetiang cancer nei an awm tawh em (genetic) tih leh leh meizuk te chu a langsar zual an ni.
Mi thau uchuak tan pawh colon cancer risk a sang niin an sawi a, kum upa tawh lam, thau bawk si te tan risk a sang lehzual.
A lan chhuah dan:
1. Ek a thisen awm hi colon cancer lan chhuah dan tlanglawn ber a ni. Ekawmdan pawh a inthlak a; ek khal tha pangngai ang ni lovin, colon cancer-ah chuan ek a nemin a tum pawh a sin sei deuh a ni thin. Chutiang hnuah chuan ek-a thisen awmin a zui thin.
2. Ek-a thisen a tel thin avangin thisen an tlachham a, an dawldang a, anaemia an nei ta thin. Anaemia vangin an lo chau a, vun rawng a lo dāng thin.
3. Chauh deuh ngawih ngawihna (fatigue) te an nei thin. Chauh riau chang chu kannei thin theuh a, chutianga kan awm vangin colon cancer kan nei ta e, tihna a ni lo. Fatigue bakah a chunga kan sawi tak ang te hi i nei bawk a nih chuan colon cancer sign a ni thei.
4. Anaemia leh fatigue bakah colon cancer nei chu a chhan hriat si lohin a rihna a lo tlahnuam thut ang. A chhan hriat si loh a thla hnih khat chhunga rihna a tlahniam thut a nih chuan colon cancer vang a ni thei. Hei hi cancer dang pancreas, stomach, esophagus leh chuap cancer vang te pawh a ni thei.
5. Inthiar dan a dang lam a, ei theih zawng te a inthlak thin. A hmaa i ei duh zawng ber te kha i lo ei thei ta mang lo va, a changa ek khal, a changa kawthalo, bathroom luh deuh sek ngai ang te pawhin a awm thei.
6. Pum (stomach) nuam lo, pum puar, kawpuar deuh reng te pawh hi colon cancer sign a ni thei. Pum nuam lo kan sawi rual hian pum na ngawih ngawih ang chi erawh colon cancer-ah hian a thleng khat hle thung.
Inven dan:
1. Colonoscopy atangin colon cancer chu a hriat theih a, chuvangin doctor-in min rawn a nih chuan in-test fo a tha. Cancer chu a nasat hmain colonoscopy atanga hriatchhuah theih a ni.
2. Meizuk sim rawh.
3. Exercise la tha rawh.
4. Thei leh thlaihnah chi hrang hrang ei tam rawh. A chi ngai ei tlut tlut ringawt lovin.
5. Fibre pai hnem chi ei nasa rawh.
6. I thau lutuk tur inveng rawh.