Rin aiin September-ah ruah a tam lo!

Han ngaih mai chuan thla liam taah khan ruah a tam tia sawi theih tur a ni a, mahse chutia a tam han tih tur khawp a lo ni lo. Nikum September ai pawhin a tlem.
State Meteorological Centre-a an chhinchhiah danin kumin September-ah ruah mm 231.6 a sur a, hei hi a tam tia sawi tur khawp chu a ni lo. Nikum September-ah khan mm 321.7 a sur. 2014 September-ah phei chuan mm 414.1 lai a tla.
September-ah hian ruah hi Mizoramah mm 200 vel chu a sur deuh ziah tia sawi theih a ni a, kumin September-a sur zat pawh kha September-a sur tura beisei zat vel tho a ni, kum dang aiin a tam hran lo.
State Meteorological Centre chhinchhiahnaa a lan danin, thla hmasaah khan ruah a tam a, mm 572.7 a tla. An chhinchhiah chinah kumin August kha August thlaa ruah tam ber thla a ni hial.
Kumin September-ah ruah a tam lo na a, a sur ngun tho a, khua a cheng fo.
Kum dangah April leh May vel a lum thin laiin kuminah September a lum tlat mai a, kumina khaw lum ber lai chu September ni 22 kha niin, hemi ni hian 33°C a kai. Hemi ni bak hi kuminah 33°C a la thleng ngai lo. Kuminah chuan nipui lai aiin favangah khua a lum zawk a nih chu!
State Meteorological Centre enkawltute chuan Mizoramah ruah a surin khua a vawt a, nipui lai pawhin ruah a tlak deuh chuan khua a dai mai zel tih an sawi. Kuminah September-ah ruah hi a tam tia sawi tur khawp a ni lo a, chutih rual chuan ruah sur tur inup vangin khua a uap thin a, hei vang hian mihringin lum kan ti thin tiin an sawifiah.