RIPANS-ah nursing zirtirtute intuaithar
Regional Institute of Paramedical and Nursing Sciences (RIPANS) a final year M.Sc Nursing zirlaite chuan “Investing in Nurses, Investing in Health: Empowering the future of Healthcare” tih thupuia hmangin ni hnih awh tur Continuing Nursing Education program chu Nilaini khan an tan.
Hmanpuitu Health & Family Welfare minister Lalrinpuii chuan RIPANS chu India hmarchhaka nursing zirna changtlung ber a ni tih a sawi a. Sawrkarin mipui hriselna a ngaipawimawh a, Mizoram Universal Healthcare mitin huapzo turin a kalpui mek, tiin, hengte hrerengin nurse-te pawh mipui tana rawngbawltu an nihna vawng nung zel turin a chah.
Training-ah hian nursing zirna in leh damdawi in hrang hrang atangin nursing zirtirtu, senior nursing officers leh nursing officers 30 an tel a. Mithiam sawmbikten thupui hrang hrang panga an zirtir.
RIPANS hi sawrkar laipui Ministry of Health & Family Welfare hnuaiah kum 1996-a din a ni a. Hmarchhak state hrang hrang atangin zirlai 800 chuang an awm. Bachelor programme 5 leh master programme 3 bakah PhD zirna programme 1 a awm a ni.
RIPANS-ah nursing zirtirtute intuaithar
Get real time updates directly on you device, subscribe now.