RIPANS-in zirchhuakte thlah

RIPANS-in zirchhuakte thlah
Regional Institute of Paramedical & Nursing Sciences (RIPANS) chuan Nilaini an zirlai zirchhuakte an thlah a, zirlai lut tharte lawmluhna leh intiamna an hmang nghak bawk.
Hmanpuitu chief minister Lalduhoma chuan India ram huap pawha paramedical science zirna changtlung leh tha RIPANS kan nei chu kan vannei hle tih a sawi a. Mizo thalai tam takin he hmunah hian zirna tha tak an lo dawng tawh a, an dawng mek zel tih a sawi.
Graduate tharten hah tak leh rim taka an zir chu ram leh mipui rawngbawlna atan an hmang thei ta chu a lawmpui tih a sawi a. Zirlai lut tharte pawhin an thawh tur hna atana inbuatsaihna an tan thei tur chu an vannei tih a sawi a ni. RIPANS-in harsatna a tawh, a bikin faculty lama an indaih lohna chu a ngaihtuahpui dawn tih a hrilh a ni.
4th Graduation & Lamp Lighting Ceremony-ah hian B.Sc Nursing degree mi 39-in an zo a, 1st semester zirlai thar tur mi 53, hmarchhak state 8 leh Jammu & Kashmir atanga kalte lakluh an ni. Class tina top 3 hnenah chief minister hian Proficiency Award a hlan.
B.Sc Nursing hi kum 4 chhung zir, 8th semester course-a then a ni a, tunah hian B.Sc zilai 196 an awm. M.Sc Nursing zirna hi kum 2023 atang khan kalpui tan a ni a, zirlai 25-in an zir mek.
RIPANS atang hian batch hmasa ber, kum 1996 atanga vawiin thlengin mi 788 an graduate tawh a. Graduate tawh zawng zawng hian thawhna tur hmun (placement) an hmu vek a ni.