ROAD ACCIDENT TITLEM TURIN ROAD SAFETY AUTHORITY LEH ROAD SAFETY FUND

James Miahlung

World Health Organisation(WHO)in zirchianna thar ber a tihchhuah, Global Burden of Disease, 2019 in a tarlan danin lirthei chetsualna(Road traffic accident) avanga hliam(Road traffic injury)hian khawvela natna thihpui tam ber pasarihna dinmun a hauh pha a. Ministry of Road Transport & Highways (MoRTH) chhinchhiah danin kum 2021 khan India ramah road accident Tum 4,12,432 thlengah mi 1,53,972 in nunna chanin mi 3,84,448 in hliam an tuar.
Road accident avanga nunna hlu tak chan a nih piah lamah ram sum leh pai dehchhuah(GDP) thlengin nghawng a nei a, sawrkar leh mithiamte pawhin hriselna lama harsatna(public health challenge)lian ber te zinga mi angah an hial ngai hial tawh a ni.
Mizoramah mihring (Population) tlem ngaihtuahin road accident thleng zat leh accident kaihhnawih hliam Road Traffic Injury(RTI) avanga thi zat(figure)a hniam em em ngai lo. Chart a tarlan angin kum 5 chhung 2017 leh 2021 inkara accident thleng leh boral zat data(MoRTH record) khaikhinin a tir lam 2017 leh 2018 inkarah hmasawnna a awm nia a lan laiin 2019-ah accident tam chho leh hret in, 2020 ah tlahniam leh deuh a. 2021 ah erawh a hma 2020 aiin 33.3 % in accident vanga thi an pung ve thung. Kum 4 chhhung(2018-2021) hian accident Tum 100 thlenga thi zat chhutna(Accident severity rate)ah national average aia sang fe a awm in India ram pum puiah a sang ber kan ni hial a ni. (A hnuaia Table hi en la)
MoRTH hian 2022 data a tihchhuah rih loh avangin 2022 a accident thleng leh boral zat a hriat theih rih lova. Mizoram police chhinchhiah danin kum 2022-ah mi pakhat emaw a aia tam an thihna, fatal road accident tum 94 a thleng a, chetsualna tenau(non fatal accident)tum 39 a thleng bawk.
Hetih lai hian Ministry of Home Affairs(MHA)hnuaia National Crime Record Bureau (NCRB)report leh MoRTH report-ah figure inang lo a awm nual a, MoRTH in road accident avanga boral zat a chhinchhiah aiin NCRB figure a sang zawk zel. Entirnan, MoRTH-in 2021-ah mi 56 boral anga a chhinchhiah laiin NCRB report ah chuan mi 64 boral angin tarlan a ni. Data lakkhawmna hnar(primary source) inang reng si figure inang lo a tam hi a mak hle a, record/data mumal leh rintlak nei a Tulzia a lang. Integrated Road Accident Database (iRAD)project kalpui a nih hnu hian data management lamah hmasawnna a awm a beiseiawm.
Supreme Court Committee on Road Safety duh dan angin state Thenkhatin State Road Safety Authority (RSA) din in road safety innghahna lungphum pali (4Es)-Education, Emergency care, Enforcement leh Engineering hnuaia hmalakna tur sum (road safety fund) ruahman a ni tawh a. State thenkhat (entirnan, Himachal Pradesh) erawh chuan State Road Safety Council(RSC)awm sa ringin transport department hnuaiah road safety cell hran din an duh tawk a. RSC hi office (secretariat) hran nei lem lo department hrang hrang aiawh telna; sawrkar hnena thurawn petu(advisory body)ang deuh a ngaih a nih avangin hmalakna a chak theih lo a ni.
RSA-ah hian RSC ang thoin department hrang hrang hotu lu (Secretary)te member ni mah se dan (Act)tlawchhana din a hranpaa officer nei a nih avangin hmalakna a chak sawt turah beisei a ni. Hemi kawngah hian mipui hriselna(public health)lama che Tha chhim lam state te a sulsutu an ni leh a. Entirnan, Kerala-ah chuan Transport & Road Safety Commissioner/Chief Executive Officer(CEO) uapna hnuaiah RSA mumal takin din a ni tawh a. Karnataka ah pawh Commissioner of Transport & Road Safety kaihhruaina hnuaiah department dang-PWD, Education, Health leh adt aTanga deputation-a kal official ten RSA hi an Thutchilh a ni.
Road safety lama hmalakna hi department pahnih khat chauhin an kalpui theih a ni lova, department/agency hrang hrang-District administration, Police, PWD, Health, municipal body, education leh adt- inrawlh Tulna thil a ni. Chak zawka hmalakna kalpui turin agency hrang hrangte khaikhawmtu tur thuneitu (Authority)hran an awm a Tul a; a taka hna a thawh theih nan he authority hi sum leh pai/road safety fund nen thuam a Tul bawk. Tun dinhmunah Road safety fund sum hnar lian ber chu lirthei bawchhiate chawi(fine ) tlingkhawm niin, agency hrang hrang hnenah RSA in an mamawh dan azirin fund a pechhuak Thin.
Road accident avanga nunna hlu tak kan chan Thin hi a pawi a, a thi(victim)te chhungkaw eizawngtu ber an nih hian a pawi leh zual. MoRTH leh NCRB report aTanga a lan danin India rama road accident avanga nunna chan zingah hnathawk thei rual, Thalai leh pavalai (productive age group)an tam ber a, hei hian ram economy leh GDP thlengin a nghawng nia ngaih a ni. Tin, RTI avanga damdawi ina inenkawlna senso sawrkarin a tumsak ni lo mimalin an sen(out of pocket expenditure) a san zel avangin road accident in mi rethei leh harsa zawkte a nghawng na bik a. Mizoramah hian zirchianna (Research) awm ta se road accident tuartute out of pocket expenditure a sang Thin hle ang tih a rin theih.
Chhungkua mimal leh ram economy a nghawng dan hre reng chunga road accident titlem turin tun aia nasa a ngaihtuahna sen a Tul a, road safety hi ngaihpawimawh (policy priority)ah dah a hun tawh a ni. Road safety authority leh road safety fund te tihpuitlin a nih theih nan chak leh zuala hmalakna awm thei se road safety-ah hmasawnna a thlen ngei ang.
(Thu ziahte hi mimal ngaihdan a ni)