Robot khawlai leng nasa thei ber

China-a mihring pianzia ang deuh neia an siam robot, a hming AgiBot A2 an tih chu China khawlaiah km 100 chuang ama tawkin a teihawi thei a, robotics khawvel tana mellung pawimawh tak niin, humanoid robot zinga mahni a khawlaia kal thui thei ber record a siam.
AgiBot A2 hi Agibot Innovation Technology Co. Ltd. te siam niin, anni hi Sanghai, China-a hmunpui nei an ni a, an robot siam AgiBot A2 hi km 106.286 a thui ama tawkin a teihawi thei a ni. AgiBot A2 hian darkar 56 leh minute 7 leh second 49 chhungin km 106 hi thleng hman a, Sanghai-a Jingi Lake, Suzhou atanga bul tanin, Bund thleng a kal a ni.
A zinkawng zawh thei tur hian he robot hi an buatsaih nasa hle a, thui tak kal tur a nih avangin kawng lakah a tluk bo mai loh darkar tam tak an enchhin hmasa phawt a ni.
AgiBot A2 hi a len vahnaah hian mihringin engtin mah an control-in an kaihruai lo va, ama khawl-thluak hmang liau liauin a che velin a teihawi ve a ni. A hmaiah digital screen neiin, hemi hmang hian facial expression eng eng emaw a ti ve thei. A kal chhung hian a battery erawh thlak a ngai thin a, a battery hi tum 15 an thlak hman.