Serie A season kal laia an vawihnih chakna ni turin Pathianni khan Jose Mourinho team AS Roma chuan an mikhual Frosinone lakah 2-0 hnehna changin, league khelh sariha point riat hum chungin table-ah 12-na an luah.
Rome khaw inkhela goal hmasa zawk hi first half minute 21-na leka Romelu Lukaku tihluh niin, Belgian striker hi tun season tir lama Chelsea atanga loan-a an hawh niin, kum 30 mi hian Roma tana league game nga a khelh tawhah goal thum a tilut tling chiah a ni.
Roma goal hnihna erawh a fal ta deuh a, second half minute 83-a Lorenzo Pellegrini hlapluh niin, he goal pawh hi Lukaku goal tur chhawpsaktu Paulo Dybala siamsak leh bawk a ni.
Goal khat thawhtu Lukaku chuan rim taka an thawh hnuah hnehna pawimawh an chang tih sawi chungin goal hmaa an tihthat an hlawkpui tih a tarlang tel.
Team talbuai Roma hi a hma chiaha an league game-ah karliamta laihawlah khan mualneitu Genoa chuan 4-1 tehrengin an sawp a, kartawpah hnehna an changkir leh thei hram a ni.
Italy-a hun hmang leh tura loan-a sengluh Lukaku chuan an club dinhmun harsa tak chungchang sawilang tel chungin game khelh tur an la ngah a, kawng dik zawhna hun an la neih thu leh Pathiannia an game ang taka an khelh zel theih a pawi-mawh thu a sawi.
A coaching career-a league bul a tan chhiat ber hun tawngbaw mah se Inrinni khan Roma boss Mourinho chuan a hma lam hunah ban hlauhna a nei lo tih a sawi.
Roma chak ve leh bauh
Get real time updates directly on you device, subscribe now.
Next Post