Rome khaw derby hnehtu Lazio

Nilaini zan Coppa Italia quarter-final boruak sang takah red card pathum a leng a, sikhat faiin AS Roma lakah Lazio an chak hram.
He inkhela goal awmchhun leh Lazio chakna goal ni zui ta hi second half tir lam minute 51-a Mattia Zaccagni penalty chhuihluh niin, he penalty hi video assistant referee-in Valentin Castellanos laka Dean Huijsen-a foul a endik ngial hnua ham a ni.
Minute 77-ah mipui lam atanga beer bottle rawn thlawkchhuak chuan Roma player kum 22 mi Edoardo Bove hnungzang fuhin, Stephan El Shaarawy chuan a thlak a; hun tawp dawnah inkhel boruak tang zualin, hun pekbelh minute ruknaah Lazio player Pedro hnawhchhuah a ni a; a hnu lawkah Roma player Sardar Azmoun chuan red card hmu ve lehin, hemi chinah hian inhnawhchhuah thawnthu a la tawp fel mai lo a, Roma player dang Gianluca Mancini pawh inkhel tawpna hamrik a rik zawh hnuah red card hmanga umzui a la ni fan!
Kum 2021-a Rome khaw team a enkawl hnua derby vawiruk a hmachhawn tawhah Roma boss Jose Mourinho chu vawili chak lo zawkah a tang a; Nilaini zan inkhelh bana media a hmachhawn tumin Portuguese coach hian chak loh hrim hrim nat tawh laia derby-a tlawm chu tawrh a har zual tih sawi chungin an chaklohna hringtu penalty kha ‘tunlai football penalty’ tiin a sawi a, VAR hmaa chhawpchhuah ngai loa referee thutlukna siam tur chi a nih thu leh referee khan metre thum dana awm chungin a ham lo a, VAR a rawn hnuah a ham leh si niin a sawi.
Coppa Italia semi-final pakhat zawkah Lazio khan he thu buatsaih laia chak zawk tarlan hman loh Juventus leh Frosinone inkhela chak zawk zawk an tum ang.
Nilaini zan quarter-final inkhel danga 2-1-a AC Milan hnehtu Atalanta chuan Thawhlehni zan last eight match penalty peta 5-4-a Bologna hnehtu Fiorentina an hmachhawn ve bawk ang.