Ronaldo contract thar a chiang ta…

Nimin lamah Saudi club Al-Nassr tana khelh chhunzawm tura inbiakna a kal mek thu tarlan a ni tawh a, vawiin lamah chuan Al-Nassr yellow and blue kit thuam nena Cristiano Ronaldo nui var var lai hmuh tur awm zui tain, ram leh club tan belhkhawma goal 938 thun tling tawh hian Saudi Pro League club tana kum hnih dang khelh chhunzawm turin contract thar a ziak.
He inremna thar ang chuan a kum 42-na piancham a lawm hnu thlengin Arab team-ah hian a cham dawn tihna a ni.
Kum 40 mi Portugal captain hi Manchester United nena an inthen dawn khan a lar chhuahna club sawiselin, an manager Erik ten Hag kha zah lo hleah Old Trafford club a puh a, football level sang bera la khel tlak zak ni mah se sum tamna Saudi Pro League lamah December 2022 khan a kal ta daih a nih kha!
Riyadh khaw club tan hian goal a khung chho leh nghal mawlh mawlh a, mahse, tun season bak hi a cham zui dawn tawh lo ni ngeia ngaih theih turin Al-Nassr lama a zinkawng chu a tawp tawh tih tih season tawp rual khan social media lamah a tarchhuak hluai a, a kal lehna tur inrinsiakna a intan nghal.
X lamah Ronaldo chuan thla khat kalta mai khan, “Bung thar kan kai ta a, football hmangaihna leh duhna erawh a la pangngai reng a, hmana kan dream pawh kha kan la thawhsan lo a, history i siamho leh teh ang u,” a han ti deuh hluai a, Al-Nassr lamin an hnen atanga five-time Ballon d’Or winner kalbo chu an lo la ngaingam awzawng lo hi a lo ni a, nimin lama tarlan tawh ang khan, inremna thara a hlawh tur pawh hi sang elh awlh tak tura ngaih a ni.
Senior goal 1000 khung tling thei hmasaber nih a tumna kal mekah, a chunga tarlan tawh ang khian, a career-ah goal 900 a thun pel duai tawh a; Arab team tan season hnuhnung pahniha league top scorer a ni zawn thei khan a vawrh sang leh dawrh a ni.
Season liamta maiah pawh inelna hrang hrang match 41 atangin goal 35 a khawl tling a; belhkhawmin Al-Nassr tan game 111-ah goal 99 a ngah tling tawh a, goal 1,000 thun tling turin goal 62 chiah a mamawh tawh a, tuna a lan dan chuan he season hnih hmabak a insiam leh takah hian record thar siam tura a mamawh chu a puitlin theih mai rin a ni!
Mimalin chetha thin teh mah se Ronaldo hian season liamta pawh khan Al-Nassr hi league title a lakpui zo lo leh a, Saudi Pro League-ah a club vawn lai chu pathumna nihpui phak awrhin, trophy an hawn zawh loh kumah bawk a chhuahpui leh!
Chu chu a dinhmun a nih avangin kum hnih leh a chenve hnua a contract a tawp rualin Ronaldo hi tunthla tawp ruala league chhuahsan turin a inpeih thlap hman niin media thenkhatin an tarlang a, amah ngei pawhin bung thar a kai tur thu a sawichhuak a, mahse, kum khata pound maktaduai 177 tehreng hlawh tura an sengluh Portuguese hi Riyadh khaw club hian an lo la chhangkham awzawng lo tih a hriat a; inremna thar an ziahpui ruala hlawh chungchanga an inremna hi vantlang hriatah pawl pahnihin tarchhuak lo mah se a tel chhe dawn lo tih hi a chiang hle a ni.
Arab mite hausakna ren rual loh chen a ni bawk a, Forbes chhut danin tunhnai kum thum liamta chhung khan khawvela infiammi zawng zawngte zingah hlawh hnem ber a ni a, Lionel Messi meuh pawh khum thei a ni!
Heti zat hian sum hlawm lianin vawm awlh awlh mah se Arab Club Champions Cup a chawipui tih loh kha chu Ronaldo hian champion zawngin Al Nassr hi a kalpui zo bik lo a, tun thlengin SPL title a la lakpui thei lo a, a teuhpui ber chu kum 2022-23 leh 2023-24 season lama runners-up a nihpui kha niin, tun season liamtaah phei kha chuan tlahniam zualin, pathumna an ni pha chauh a nih kha!